屋企養咗ｄ花展果陣買既空氣草，爸爸用個玻璃樽加ｄ石春同水，再係離水面兩寸地方用鐵線吊住棵草．等水氣蒸發時可以俾到佢滋養．
日積月累，玻璃樽入面漸漸長出青苔．我就成日投訴，但爸爸始終都唔肯換咗ｄ水佢．
爸爸：水質靚先有青苔架！
後來，佢買咗包蝦仔返來，倒入個樽度，等蝦仔食青苔喎．原來早有預謀架！
誰知ｄ蝦仔非常勤勞，好快就令玻璃樽清淅透亮，加上蝦ｂ不斷出世，實在要提供新食物來源啦．
於是，爸爸又買了兩包水草回來．
見唔見呀？又一隻身懷六甲既準蝦媽媽啦．
佢似乎都幾喜歡呢間豪宅
另一隻準媽媽就去咗花園散步
佢有幾大？睇下我隻手指尾就知啦．
咁大家都應該想像到ｄ蝦ｂ有幾大啦．
至於原本係玻璃樽既蝦ｂ呢？就要自己係度生活啦．
見唔見佢地唧？
冇咗大蝦搶食，睇怕樽底果ｄ剩餘物資都夠佢地食一輪架啦．
陪太子女去補習，一坐低Bibi就係老師檯上發現這一罐餅餅．
楊莓白朱古曲奇，Bibi立即吃了一塊，大讚！
咦？乜Crabtree竟然有餅餅賣？等我都試下先．
對我黎講，偏甜喎，香味亦未算好大，一般貨式咋喎．
事後諗諗下．．．．係喎，我以前咪收過佢既茶包同曲奇架咯，真係大懵，冇晒印象添！都幾對唔住送俾我果位仁兄喎，要反省下啦．
我公司咁耐以來請返黎既嬸嬸，臥虎藏龍．有手作達人，可惜大家只係佢度學完整紙玫瑰，佢就轉咗工啦．
早期有個伊斯蘭教嬸嬸，最錫就係我，因為佢係食早段晏仔既，知我要趕project，就成日買定飯盒俾我，一夠鐘就有飯食．
又有個好斯文既嬸嬸，係Annual Dinner一變身，成個小學校長咁款呀！我見過佢手字，仲好好文彩添．
而另一個呢．．．．就靚爆鏡，仲係Christmas Dinner贏出最佳衣著女士獎．睇住佢戴上后冠同拎住手杖，大家都為佢熱烈鼓掌呀．當晚Bibi仲借佢ｄ道具黎影咗幅相添．
今次呢位嬸嬸仲勁，佢入得廚房，出得廳堂，唔單止做事爽手利落，仲好拿手做蛋糕添！
嬸嬸既親戚順德廚神做既魚腐，我真係食過返尋味，外面街果ｄ都要行埋一邊呀，我每次收到，都會分兩次食，想ｄ幸福可以維持得耐ｄ，嬸嬸都想佢走之前再整俾我地食下．
咁啱廚神又好喜歡嬸嬸做既Tiramisu，於是就提議互相過料，一拍即合．可惜呢樣秘製魚腐實在太繁複，嬸嬸睇完，即刻大叫咪搞，都係等呀廚神重臨香江先請佢再煮好過好啦．
至於呢個蛋糕呢，嬸嬸就搵咗個星期日，示範教學，一次過做咗十個蛋糕，幾款口味，除咗益下我地之外，仲會叫埋班朋友，預備生果，一齊拎去老人院探訪既．
我原本剪咗個哈哈笑既模俾佢用來灑糖粉既，早上仲好地地架，我放工果陣心血來潮，諗住如果一陣坐車搖咗"骰仔"咪弊！於是走去影張相先，點知．．．個哈哈笑竟然消失咗．．．
原來D糖霜經唔起ｄ水氣，早就溶咗啦！
咁算啦，食完晚飯，切蛋糕．嘩！手感一流呀！（唔知點解，好多時同ｄ朋友同事等等食蛋糕，如果要切既話，大家好自然都係叫我郁手既，所以我真係切蛋糕無數架！）
佢冇用手指餅，仲啱我口味，冇咁漏．入面塊蛋糕都係佢自己焗既，異常鬆軟，就好似天使蛋糕咁輕盈．
可能有人會怕咁多cream，但我就好鍾意既．
放一啖入口，噢～～～
我原本都仲會間中幫襯下COVA既，依家．．．．你叫我仲點出去買蛋糕食呀？
我雕印仔，好少刻意咁去計時，次次都係粗略估計就算，因為中途多數會分心既．
今次呢，爸爸去咗開工，Bibi就去咗補習，我一個人係屋企，一定冇人騷擾啦．
好！就等我俾大家一個見證：唔計畫圖同轉印，開始時間係11:10a.m.
今次想睇下自己既功力去到邊，做一個幼線章．我係兒童圖書館搵到呢隻豬豬．
成日聽到姨甥女話係小雨天食湯飯，呢日終於同同事一齊去幫襯下．
同事叫咗呢碗魚皮餃上海麵．
我想食蠔仔肉碎湯飯架，但一見到餐牌寫話有自家製上海麵咯喎，咁就梗係要試下啦．
我呢碗豬潤肉碎湯麵，有埋冬菰同唐芹等香菜既，熱辣辣，冬天黎食就最啱啦．我諗下次都係要飯好ｄ，食湯飯會食得暢快ｄ既！
終於都搵到一日去食湯飯啦！
呢碗係同事叫既豬大腸腐竹紅薯粉（少辣，我試咗一件大腸，ｏｋ，冇異味，亦夠淋．
我呢．．．．ｄ野一黎就開始食，爭ｄ唔記得影相交差．其實佢上檯既時候係一窩湯，同一碗飯既．
我要咗豬軟骨湯飯，入面都幾多塊豬軟骨下架，仲有好多黃芽白同唐芹芫茜等．我對唐芹同芫茜都冇乜好感，但如果叫人走咗佢，又好似唔係幾啱風味咁，照食把啦．不過，ｄ湯只係算夠熱，唔係大滾，呢下間店真係應該改善下．或者佢想ｄ客食得快ｄ，可以翻多次檯掛？
同事一見有成碗飯，仲問：你食唔食得晒架？
呵呵！我最鍾意食粥同湯飯架啦，卓卓有餘定啦！
29/11，我地同媽打預祝生日，出席既有：眾人媽打，如月，玻璃人+琳琳，開心快活人同佢honey，show me同埋我．
我地揀咗呢間：係荃灣廣場既紅螞蟻
呢度唔算嘈，叫做幾好坐啦．
我地叫咗一個四人餐加一個二人餐，再加一客炸馬介休球．因為show me係會員，有折，埋單只係五百幾蚊咋！ 小食併盆，長春卷，好味！ 三文魚焗飯，飯粒較硬 焗牛肉飯，呢碟我唔食得既，所以冇試． 套餐果客炸馬介休有四粒，散叫果客多一粒 白汁雞肉長通粉，呢碟幾好味，但要趁熱食至好． 腸仔意粉，呢碟既紅蘿蔔出奇地好味喎． 鴨胸薄餅 薯角燴豬柳 四人餐包四客餐湯同四杯飲品，仲有甜品添！炸麻蓉湯丸，都幾好食架，估唔到三角形果ｄ係雪糕黎． 食完就切如月做既生日餅，薑汁慕司豆腐芝士蛋糕． 呢輪我懶，冇咩好整，連聖誕野都提不起勁去做．所以就入元朗，買ｄ黑芝麻花生糖俾大家試下． 多謝玻璃人送我既圍裙＆隔熱手套，同開心快活人送既蘋果醋，我已經飲咗lu． show me既朱古力，好得Bibi歡心．據偷食果隻老鼠回報，四方形果粒簡直一流呀！ 媽打送既電話繩，我拎返去俾Bibi拆． 佢一打開就話：送俾Sally佢一定開心死唧！等我聖誕節俾佢揀一個，我地就可以一人一個啦！ 喂！咁你算唔算械劫媽媽呀？ 我知媽打鍾意花，但我唔多曉插花喎，係咁意set一盆花仔送俾佢．麵粉花有度好，經得起時間考驗，呢ｄ花仔我五年前已經做定架啦！ 大家竟然話：乜咁大既！ 佢地見慣我ｄ蛋糕仔，呢盆野，真係算好大架啦！
