放完假返到公司, 就見到檯上有個包裹, 原來係Jasmine送俾我既禮物, 仲用公主信紙寫便條俾我呢. 彷彿又回到少女時代.....
睇睇盒底, 雙重朱古力呢! 用dark choco包住架, 正! 我地有時都會交換下零食情報既, 呢盒東東梗啱我啦!
今日, 做做下野, mailing哥哥又送包裹黎, 單睇咁款, 睇怕大家都估唔到係邊個送既....
話晒都係花花寶箱喎....
裏面裝住好多做手作既材料....仲係同色系既添! 真係要好好咁諗下點用佢地先得... 你地估到係邊個寄黎未?
開估啦!
係我既哎吔Bro呀!!
好多謝你呀, 哎吔Bro!
昨日爸爸開完工，一早六點零返到屋企，拎咗包東東上黎，原來是小熊(夢遊小熊 )送我的禮物。一定係佢地去完旅行既手信啦, 真係多謝晒啊！
淺藍色既字，我老花睇唔到添！爸爸就梗係落井下石架啦：「老花哩，睇唔到哩！」咩呀！犯法呀？拎去光d既地方睇下，勉勉強強叫做睇到啦。
咖啡朱古力，係咖啡味朱古力包住炒香咗既咖啡豆。千其咪嗒溶咗外面先食粒豆呀，苦苦地既。雪夜車餅餅，Bibi納咗。唔，蜜瓜味糖糖喎，等我小心搣開佢，咪整爛張包裝紙至得！味道呢，就有d好似廿幾年前係日本百貨公司買既蜜瓜糖咁啦, 但就唔會食完一口都係甜甜既蜜瓜香氣。
爸爸見到檯上面有條彩色既幼線，大驚小怪：「咦！點解有條彩色線係度既？」
我：「咪係用黎紮住個包裹架咯。」
Bibi：「係你拎上黎架喎，乜你頭先老花睇唔到呀？」
哎吔！夠鐘去搭村巴啦，拿拿臨出門口，做咗尾二果個乘客，差唔多要行到車尾先有位。中途俾人攔途捐獻，又有貢品收，有個街坊俾咗呢d零食我。
呵呵，係就係論盡d，挪住係手，快快脆脆坐低先，睇下，有蛋糕仔同好鬆化既芝麻酥餅，真係一個星期既好開始呀！
A-Maths叔叔呢輪肚腩大過南瓜，梗係食得肉多啦！見爸爸煲咗ｄ素湯，就拎ｄ過去俾佢飲，順便探下牛B啦．
唔覺唔覺，牛B都成三個半月啦．差唔多識反身啦，但就仲差ｄｄ，連第一重既乾坤大挪移都未練成．
牛B，點呀你？飛咗個新髮型呀？滿唔滿意呀？
等我睇過，冇以前咁靚仔喎．
之但係咁，都難淹你個俊樣既．喂！駛唔駛一聽到人地讚你就咁lum呀？
做人要謙ｄ先得架．你要乖ｄ呀，等May同你掃下個頭仔啦！
正吖哩，Bibi姐姐都好鍾意咁架．
都係唔好，容乜易你上癮架．．．
好啦，就間唔中過黎同你掃兩野啦．
爽呀可！
知你反身唔係幾掂架啦，努力咗咁多次都未得，就幫下你啦．
係咪當堂見得多ｄ野呢？
好鍾意呢個紙巾盒哩，幾靚！呢個係曲奇怪獸呀．
仲有Bibi姐姐都鍾意既Elmo，係佢地紅社既吉祥物黎架．
聽婆婆講，你都係麻麻地乖咋喎，精既就醒醒定定，咪玩天光都唔訓，如果唔係呀．．．，玩殘晒ｄ大人，你都冇好日子過架咋！
星期日爸爸開工, 見仲有半包素肉排剩, 唔好晒, 食完早餐返屋企, 叫Bibi將佢切粒, 炒定兜飯俾爸爸返黎食.
其實我主要係想教佢學另一款刀法 --- 點樣片薄d材料先切.
佢見佢準備晒薑米, 素肉排粒粒, 打鬆咗d飯, 蛋, 欖菜, 橄欖油, 再叫佢略述做法, 叫佢記住炒熱d飯先好加蛋呀.
Bibi: 我點知d飯點先叫熱呀?
我: d飯炒熱咗, 佢會一粒粒識跳起架, 就算唔跳, 你都feel到佢有煙啦...
我: 咁你自己一個搞得掂啦, 我唔睇你架啦.
Bibi: 嗄! 唔好啦~~~
我: 唔死得人既, 我出返去, 你有咩唔掂就叫我啦
我係廳度上網, 聽到佢係廚房開火, 應該放緊油掛.
Bibi: 我點知d油放得夠唔夠呀?
我: 是但啦, 就算放得少, 都煮到既, 你果隻係易潔鑊黎!
Bibi: 我點知d肉煮熟未呀?
我: d素肉本身係熟架, 你繼續煮啦.
到爸爸打返黎, 我話只豬好努力咁係廚房炒緊飯俾你食, 佢一陣要去跳舞, 諗住出門口之前整定等你返黎食. (講到佢幾咁生性呀!!!) 收線之後, Bibi就報告搞掂啦.
我: 你試咗味拿?
Bibi: 嗄~~~~, 唔記得放鹽添! 弊! 又唔記得加欖菜添!
初入廚, 蝦碌在所難免架啦.
我: 唔怕, 開返火, 加返d鹽同欖菜, 再兜炒一下, 一樣得.
終於呢碟蝦碌炒飯就係咁完成咗啦!
仲有一份留返佢第二日做午餐添!
同場加映, 我地下午係千色廣場既 "手作之店Tezukuri No Mise", 佢係食雪糕既, 我地試完味之後, 就買咗十蚊四粒既雪糕大福餅食啦.
開學啦！梗係有功課交啦。
新買咗粒印台，竹葉色，唔知印出黎咩效果呢嗄？
雕咗條熱帶魚仔，印黎睇下先。
淺淺地色，都係用黎印樹葉同草好d喎。我諗住用黎油顏色既，咁不如試下深啡色啦。嘩！好正喎。
等我油d顏色上去先!
呵呵, 都ok喎! 即刻變成一條精精靈靈既魚啦!
唉吔! 只顧睇條魚身, 依家先睇到d氣泡未修正添!
吉之島韓國食品節又黎啦！放工梗係要去掃下貨至得。
買咗一堆小食同餅餅，其實一心想話買薯仔麵架，早兩年食都係十六個幾一包，上年已經要廿零蚊啦，今年居然要卅幾蚊！貴咗咁多，唔買！
上面包小吃蜜糖螺絲粉比較特別, 但未開, 估唔到紅色果盒餅餅咁好味. 比我之前食開既日本貨好d. 拍得住白色戀人.
果罐喉糖都幾好, 似利口樂, 糙米薏仁茶係i:dc買既, 唔駛去到淘大咁遠咯. 粟米仔Bibi用咗黎炒飯, 溫室蕃茄佢仲未煮.
爸爸堅持要買呢d多士仔, 仲話俾買蒜蓉, 洋蔥味, 但Bibi就想趕絕爸爸, 要晒蒜蓉, 洋蔥味, 咁我就做好做醜, 當一人一包, 要咗兩包牛油味啦.
順手買咗兩件衫俾爸爸，又執幾件配合Bibi新校服裙既吊帶底衫，仲買埋個五層不鏽鋼單柄煲添！(個煲煮起黎, 熱到不得了, 除咗手柄唔熱之外, 連煲蓋都熱到飛起)
購物完畢都肚仔餓啦，我地去咗呢間「自家烏冬」食，等咗幾個字先到我地。
係門口櫥窗可以見到佢地點切烏冬。
餐牌好簡單，其實冇咩選擇。
爸爸既野菜天婦羅湯烏冬
店員尚算親切, 服務俾個B佢啦! 會唔會返兜? 唔會啦, 不外如是唧. 拎住不零蚊, 可以有更好選擇.
