奶茶香@蘭芳園

專登黎呢度食早餐，想試下佢既奶茶正唔正．係口腔未受其他食物污染前，試一口先！

唔～，都夠香，但未夠滑，可能奶放得唔夠．呢杯野，冇落糖都唔難飲，即係合格．



四維都貼晒報導，出名撈丁，可惜我ｎ年前黎食過，覺得雞扒撈丁好油，not my cup of tea．

我點咗火腿通粉，睇下佢用邊款．都係普通茶餐廳細粒光身通粉，冇乜特別．

腸仔煎雙蛋，有冇搞錯呀？兩隻蛋都打到穿晒既！

檯上仲有張咁野，都幾串下．

因為想試埋佢既奶油豬，同睇下茶走會唔會好ｄ，所以我去多次．

本身包底係軟豬黎，並不是硬豬仔包．但一樣烘得香脆，入面搽既奶油都夠，上下都沾到，算ｏｋ．



呢塊吉列魚柳，算唔錯架，皮唔厚，又新鮮熱辣，食到最尾果啖都係熱既．今次隻蛋冇穿啦，不過pad沙律醬駛唔駛咁大pad呀？根本用唔晒架，咁咪晒野咯！

我今日試咗茶走，都係普普通通．冇辨法啦，沖茶果位只係十零歲既哥哥仔，都唔可以要求太多咯．