與各大長老歎私房菜

又買到團購餐，難得咁就腳，就試下約埋家中長老出黎試下啦。



睇下個餐單，除咗牛展之外，我樣樣都啱食。

先黎瑤柱松茸桂花羮，味道一般，冇乜特別。

海蜇牛展，不過不失。

黑松露魚柳多士，塊多士脆脆地，我見Bibi叫我whatsapp呢幅相俾佢，應該好啱年青人口胃。

我最欣賞呢碟士多啤梨豬仔骨，好入味，肉又滑，一D都唔韌。



呢碟七菜蘭度珍珠鮑，主角應該係蘭度。



我就幾喜歡，但鮑魚仔就有D硬，有D腍，唔係咁平均。Bibi最怕食三色椒，所以專揀松子食。我地成碟一粒都食清。

高師父頭抽雞

拎黎果陣，夾起件雞真係幾高興下架，估唔到入面咁熟，都唔算鞋。因為食完上面果舊豬仔骨都飽咁滯，爭D食唔晒呢隻雞。

窩湯麵一上場，大家就鬆一口氣，應該都到尾聲啦。我地已經冇乜胃納，但又唔想浪費食物麻。我地問佢要咗碟辣醬，據聞係高師父出品，都幾辣下。

呢個蛋白杏仁茶就認真敗筆，做咩唔熱架?冇預先整熱D碗就裝出黎奉客，到上檯就注定失敗架啦，畫唔到一個完美句號。做主管既，應該反省一下啦。

 

侍應有禮，但招呼就唔算周到，冇人提點呀。好似公筷咁簡單既一項，佢地有提供，但就弊在冇同時俾多個筷子座或者搵隻碟墊住，變咗一撤走碟餸，對筷子何去何從呢? 有骨落地既菜式，中途冇換過碟，其實都幾失敗架，我地都興環保既，洗少隻碟係好事黎。但好多食客唔會咁同你諗架。店仔細細，只要大家肯坐埋傾下，要改善真係唔難架。

 

至於上菜方面，都做到不徐不疾既，可以講得上合格。只要服務改進一下，要有回頭客，真係好易架咋。

你如果問我會唔會推介俾朋友? 我話: 會!