一連兩天的越南餐

15/01/2013，黃昏六點零，我同朋友去呢間分店食團購二人餐，果陣得小貓三四隻，搵個位坐低，點好個二人餐。

我地要咗蒸粉卷、三絲湯河、香茅雞扒飯、蒜蓉炒生菜、熱薑蜜同埋熱話梅蜜。

我問杯飲品可唔可以後上，短髮侍應大姐佢話: 冇架喎，一定要一齊上既。咁我都明白小店費事同你跟單既，算啦。

原來佢地係用不鏽鋼保溫杯既，冇問題。但杯野甜到暈，杯柄又痴立立。我請侍應大姐同我加D熱水，佢只係拎起一杯櫃面早就倒好咗既水，再加D熱水入去俾我，仲要只係一杯咁大把，等我地兩份分。我地加咗入去杯飲品度，咩都唔熱啦，仲唔暖晒咩?

好啦，湯河先上場，嘩，都幾咸喎，我冇出聲，或者朋友覺得啱味呢？但入面真係得好少粉，D湯蓋過一切。

跟住黎碟飯，雞扒切到幾碎下，凍冰冰，又乾又柴，唔通一早整定擺咗好耐? 而D飯呢，極其量只係暖架咋。

碟炒菜份量好細，但都叫做熱既。

蒸粉卷係四方形既，即係一人半條粉卷既份量。好奇怪，件粉卷雖然好熱，但個底就硬掘掘既，好似包好咗好耐，放得耐得滯，底部既皮乾晒先拎去蒸咁。

呢個二人餐只係$68唧，實在都唔可以要求D咩既。

老實講，咁既份量，又真係唔多飽，拎個餐牌睇下，我地再叫咗碟咸魚炒雜菜同一客生菜包($56)。點知轉頭又話冇咸魚炒雜菜，要我地點馬拉盞炒通菜($42)，是但啦，其實呢兩碟野加埋，已經貴過個團購餐好多架啦。點知上檯既炒通菜，份量少都算啦，好似竹籤咁粗既菜莖，都竟然係好老既。生菜包呢，就係一塊唐生菜葉，兜住D肉碎，傍邊再有三四塊菜葉咁。隔離檯既自由行嬌娃，好奇想知我地碟生菜包係咩黎，問侍應哥哥仔，佢爭D唔識答。

其實當時只係進入晚餐時段，但我聽到廚房已經話冇晒河粉啦。我地既食具，得返隻碗同筷子，碟生菜包上檯時，個侍應竟然唔為意應該俾隻匙我地畢肉碎。要我開口問，先拎俾我，服務質素真係差勁。朋友話：乜佢地唔係做緊推廣架咩？咁既服務質素，唔係倒米係咩呀？

16/1，仲有張團購二人餐係手，明知呢間野麻麻，就費事再約朋友去食啦，都係快快手第二日再同爸爸去食埋佢算啦，叫做俾多次機會呢間店，睇下係咪只係我琴日黑仔唧。

坐落，我就好熟手咁落單。點咗春卷、香茅雞扒飯、香茅豬扒撈檬、湯浸油麥菜、熱話梅蜜(我話咗唔好飲架啦，但爸爸都係要試，由得佢)及青檸梳打。

第一樣上檯既係菜，一樣係少少既份量。



爸爸既雞扒飯呢(起碼冇切到叉燒咁薄)，今次個樣就企理D啦，但我冇試到。



到我自己碟撈檬黎啦，好感動，D豬扒竟然係暖既。呢間既魚露既味道都幾淡下，係引唔到你返轉頭再幫襯佢既。



春卷呢就一人半條，正常味道。



我杯青檸梳打只得一小片青檸，佢既威力唔足以發揮到D咩作用，所以只飲到梳打水味。



爸爸既話梅蜜



現場所見，有人客要求兩杯熱水，琴日果位侍應大姐應咗就了，後來另一位侍應真係俾咗兩杯熱水佢地。我見到果檯客都叫咗好幾樣野，好明顯係第一次點越南餐既新客仔，好心佢地就珍惜D散客啦，有回頭客，先會好生意架。

隔離檯個哥哥就點咗碗生牛肉湯河同春卷。碗粉上場，只奉上一只小碟，上面只有一小角青檸同幾粒紅椒碎。爸爸話係沙田果邊點呢樣野食，係連埋一份好幾樣香菜既東東上檯既，而碗粉仲係好滾既，可以淥得到D香菜。呢間既，就孤清得多啦。最搞笑既係，人地明明點咗碟春卷要黎送麵食，食晒碗野都未有得俾佢，最後係取消張單結帳走人，認真倒米。

後尾，我見到果位侍應大姐對D外國人特別殷勤，人地坐低唧，佢就一味: Wifi No.? Wifi No.? 咁問人地駛唔駛係度啟動Wifi啦。人地未食野，佢就俾咗隻碗，入面裝住D生既唐生菜佢，或者係一陣俾佢用黎包春卷食既都未定。真係有大細超之嫌呀!