中文金曲

都唔記得係邊度得到呢包宣傳品架啦，如果唔係執櫃桶都唔會見返天日。歡樂今宵既贈品，可能係商場入面派既。



1985年，睇怕好多人都未出世。當年炙手可熱既男女歌手，包括各位老、中、青殺手。

五位入面，兩位已經唔係度啦。當年D人好興拎住歌詞跟住唱既，卡拉OK尚未火熱。

永遠的梅艷芳，可謂後無來者，兩位天王天后，一個唱到最後一口氣都要繼續；另一位就輕生，踏上不歸路。

我好少去演唱會既，除左上年俾人屈去睇既咪咪姐演唱會之外，我後生果陣只睇過林子祥同譚校長既演唱會。我比較喜歡阿Lam唱最愛主題曲。

陳慧嫻若不去外國既話，本應坐享姐級地位。早兩年見佢除夕倒數仲要著住短裙仔扮少女唱返跳舞街，覺得佢已經時不我予咯......

小鳳姐既順流、逆流同埋隨想曲既歌詞都好有意思，一句"是我的雖失去他日總會有"，最啱用黎安慰人。

想就咁掉咗佢架，但唔KEEP都KEEP咗咁多年啦，又唔係好阻地方，就俾佢入面櫃桶底啦。