美食博覽 2013

為咗避開人潮，我硬係以為去會展，一開場就入先係最好既。點知原來都唔係架!

今年雖然我都係揀咗開波第一日就去，但之前果晚，阿仔借咗隻Life of PI俾我煲，搞到我地夜咗訓，就晏D起身啦。所以今日係成十一點幾先去到，又好英明咁係鷹君中心間七仔買定飛入場，去到都行得好舒服，仲未係好多人。

唔計月餅，我只係連入場費，用咗$506唧。都冇咩貴野買過，最貴都只係買咗$120兩包既海瑞貢丸，同埋下面果幾樽醬($110)。




但我世估唔到，我一入場，就遇到樣野，二話不說第一時間買咗，佢仲係同美食博覽冇離啦更既東東黎。

你地估下係咩吖?

竟然係蜂花檀香皂呀! 我呢個哎吔奶奶算唔話得啦掛? 有一年阿仔老婆問我邊度有呢隻皂賣，我當時老點佢去國貨公司買。今日見到，$16一盒四件，啱晒! 就重D都托返去俾佢啦。

呢包係黑珍珠花生，佢真係算反通漲架啦，幾年黎都係賣$40斤。

有機菜我次次都買架，但呢輪大小不良都成日唔係度食飯，我都冇乜心機買啦。只係像徵式買兩粒有機青檸玩下啦。($10)

廿蚊三包菰，買多三包送多包，咁好啦，就買埋佢，醒三包俾嬸嬸，兩包俾Candy姐姐，自己食兩包。

今年買美心月餅就抵啦，用匯豐卡可以有額外九五折，買五盒就送一張$50餅卡。我地既入場費即刻回本。十二點前，買滿$300，就送一個奶皇月添。我地落單果陣剛好十一點五十幾分。

ACE餅，$25三盒任揀。

各款榨菜，$2包。

$15兩罐蘑菰，見冇乜買重野先買架咋，用黎煮齋好方便。

$28樽蝦醬，原來蝦醬早就進化咗，有辣味架啦，但我都係買返原味。

係現場仲食咗胡椒餅($15，把鬼!可以講得上係難食，同前年我係維園食果D差得太遠啦。)阿波羅$20雙球雪糕，都幾大球架。$13唔知咩豬肉餅咁款既東東，同D腸仔一齊係架機度碌碌下咁煎既，$13，唔好食既! 加埋D濕濕碎碎既試食、試飲，都好多野落肚架啦。

返上公司放低多少野俾同事，就同Bibi去Tea。佢果頭話飽，唔想食咁重手野，又話唔去茶記，又話要搵間西式既餐廳。點知就揀咗呢間石板街上既Shake & Buns，喂，下午茶食呢D咪重難頂!

快餐店仔一間，坐底一個漢堡要$60。

一個餐，包+薯條+汽水一罐。話就話即做，但都要等幾耐下，成間店得我地兩個客架咋。

見到我既燒雞胸漢堡嗎?外圍好似來自非洲咁，入面有蕃茄同生菜絲。

好彩切開入面唔係咁黑既唧。咁款既包要$60既話，我不如去Starbucks食件餅，起碼杯飲品係堅架麻。



Bibi果個叫Debbie Does Dal，牛肉漢堡+芝士煙肉醬+生菜蕃茄

加埋兩罐雪碧，成為$163，我地食剩晒D薯條，份量好似原封不動咁既。個店員見我地已經食完個包，想同我地掉晒D薯條，唔係啦掛? 趕客呀? 當時都有幾個客係度，又唔係好多人。為免浪費，我拎走咗佢，帶返屋企，另外加D材料煮咗咖哩俾爸爸食埋佢。