Monsters University 怪獸大學 - 大眼仔 Mike

整咗呢個印仔個幾星期啦，再唔貼出黎，就OUT架啦!

老實講，我同佢真係唔多熟，連佢套新片都冇打算睇。但書展其間，見到朋友貼咗佢張玉照出黎，咦，佢有鋼牙架喎，真係幾可愛既。咁我就有衝動整下佢啦。

首先，因為幅相唔係全相，有D部份要靠估，另一方面呢，佢原本個甫士係雙手伸開既。

嘩！咁咪要晒好大忽擦膠？梗唔得啦。。。。我咪同佢改甫士咯。



於是我就老屈佢去叉腰啦。至於指甲呢，我認為返學既小朋友係唔應該留長指甲既，所以我同佢修咗甲，而腳甲呢，都係圓Ｄ會好Ｄ。

細塊裝既橡皮，我都只係用短身果邊咋。我知我描線描得好差，人地隻眼咁圓，我都畫到熬晒，所以預咗十成九整完出黎，都唔慌靚得去邊。

全線條，自然要萬事小心。好不容易分咗兩日雕好晒，正在做最後修正工作時，家姐whatsapp我，掛住應佢，一下唔覺意批崩咗大眼仔隻手指公！

果一刻。。。。我真係。。。。

都要去上下墨試印架，至多崩咗就人工加返筆啦。

見到嘛？崩咗少少。

再認真Ｄ上一次墨，印過，又冇乜事喎，但點解隻牙有牙屎既？原來印台上有一忽擦膠碎片，咁順便修埋瞳孔同手腕先再印多次啦。

算啦，雖然印花咗少少，遲Ｄ有心情先執啦。

好，上色玩下先。

原來油好晒之後，效果都幾ＯＫ喎。

我都有興趣做埋毛毛架，但仲未搵到合眼緣既後生版毛毛，未有計仔住。