捐血第四十八回

爸爸係冇定時定候去捐血既, 總之方便自己，又有足夠休息果輪就去捐下.。

 

大大話話, 幾十年黎都捐過好多次.


唔知係咪血庫好缺O型血, 一捐就要佢捐五百CC. 好彩佢連放幾日大假, 咁就可以攤抖下啦.

呢個排骨仔爸爸, 咋咋帝帝, 捐完又話要坐月, 想賴貓唔洗碗就真！

 

以前都冇話有咁多單張, 提醒大家要注意既事項.

 

爸爸成日賴醒架, 有次護士小姐問佢駛唔駛麻醉, 佢竟然話唔駛, 咁人地咪唔同佢客氣咯，真係攞黎衰既，明明痛都要死頂。

 

 

佢以前好鍾意帶埋Bibi去, 陪佢捐血, 等佢覺得爸爸好英勇咁話. 點知呢個小朋友就自己走去睇卡通片, 眼尾都冇望下爸爸。搞到佢做唔成英雄添！

如果唔係睇咗呢D列表, 都唔知黑木耳原來咁高鐵既!

爸爸冇手尾，成日都唔知張捐血卡放咗係邊既, 姑娘一按電腦, 就知佢已經捐到第四十八次啦.



以前就叫人三個月去捐一次血, 依家兩個半月就叫人去捐啦, 駛唔駛咁密呢?



傳聞有關當局冇好好處理D血包, 令到有好多血包都要銷毀, 唔知係咪真既呢?

但捐血係要黎救人既, 如果因為有處理失當, 令到冇人肯去捐血, 咁D有需要人士咪救唔返咯?

早幾年，爸爸吃素，身體比較弱，所以捐血次數減少咗。護士姐姐同佢做初步檢查，一句：好心你啦（仲捐？）！搞到佢有好長一段時間唔敢再去俾人瘀。

呢張捐血記錄卡睇怕都係廢架啦，自己睇網上版好過啦。

依家仲有宣傳，呼籲年滿１６歲既青少年去捐血。

如果你地都有興趣參與既話，可以睇下邊個捐血站就腳Ｄ架。