太湖大閘蟹餐

5/11，朋友吹雞話去佢屋企打邊爐，點知最後變咗出街食大閘蟹。

臨急臨忙，求其搵間近近地既，放工去。終於我地去咗呢度食，菜式都唔錯。話就話$568一位，但其實拎住呢張優惠券係買一送一既，咁即係連加一同茶錢都係三百蚊鬆D唧。

一個餐有兩隻蟹，我地五個人去，叫咗兩套，送兩套，都有八隻蟹啦。自行加兩碟餸，再追加一隻小籠包同一碗薑茶湯丸，咁就差不多夠食啦。

先黎既燒腩仔同叉燒，相當有水準，尤其叉燒，果然係招牌貨。12粒燒腩仔同8件叉燒，剛好一人有四件。

雪影明蝦球，普普通通，賣相可以。

蟹粉小籠包，都有湯汁既。部長驚我地一夾就穿，專登幫我地逐隻夾入碗。

四碗金湯小米燴遼參

我每碗畢兩匙都有咁多啦，入面既小米夠煙韌，遼參又夠滑溜，好食! 

熱辣辣既黑豚肉，其實唔係好多片，配菜既蔥蒜同菰菌較多。

食咗少少野暖肚，大閘蟹就上場啦。

乜唔係話九月圓臍十月尖架咩?仲係農曆九月喎，隻隻都係公黎既?好彩都好多羔。

老老實實啦，其實大家都唔係太好食大閘蟹，所以一人食咗一隻已經冇人願食第二隻，勉為其難開多隻三份食，剩咗兩隻就要打包。

間酒樓都好貼心服務，見到我地唔再食蟹，可以收起D野，先上龍躉扒。估唔到呢味咁正，我食蟹果陣冇乜點到醋，就拎D魚黎點，果然仲好味喎。

跟住上米湯豆苗，清清地。

最後上湯丸

同鮮果盆，大家都好夠飽，又唔會食到漲住。

埋單果然係三百零蚊一位，大家有興趣既，可以去試下。

如果冇優惠券點算?可以訂檯時搵方小姐，即係琪琪，問佢如果冇優惠券，可唔可以俾你食大閘蟹餐既優惠，佢或者可以同你地安排架。