Dinner @ 北京拉麵

成日買定D二人餐，方便同朋友一聚。

呢間北京拉麵，我過年時係西九食齋宴經過，已經想黎試下。

$120既二人餐，正價加一$24，即係$144，睇下有咩食先:

星期五放工，七點鬆D去到，得幾丁客，直至我九點走，一路都係維持十零個客左右，依家飲食業真係咁差咩?遠處有張大圓檯，就算人多少少，都可以一齊坐。

牆上有各款京戲裝飾

雞絲粉皮，用既係燒雞切絲，重蔴醬，一定唔會輸。

小籠包普普通通，皮算薄，咬開都有湯汁既。

個炒飯比較細碟，但我地都食唔晒，你地估下點解我要打包半碟走?

就係呢煲砂窩雲吞雞出事啦! 好香火腿味，真係有半隻雞係入面，仲有半打雲吞同菜膽，熱辣辣。隻雞唔係煮到霉晒既，仲好有味道同咬口。我地已經盡咗力去食架啦。

豆沙窩餅，表皮係脆卜卜既。如果大家有留意佢既餐具，都睇到好有中國風。

$144，真係超值架啦。

其實同期仲有另一款餐可以揀架，但二選一既話，雞餐既菜式就比較大路D，所以我就唔要魚餐啦。