欖油蒜片蝦仁炒意粉 - 邊個話唔可以再簡化D架?

仲記唔記得我以前煮果碟 帶子蝦仁雜菌炒意粉?

今次我一個人食，要再煮得簡單D。

係吉之島超市買咗包雪藏蝦，分開兩份，琴晚已經拎定落下格解凍架啦，返到屋企沖一沖就用得。反正呢款都冇蝦腸既，咁我就索性連廚房紙都慳返，泌咗D水就加少少魚露同黑椒粉撈勻佢啦。

兩粒蒜子切成片

意粉一人份，約一個一蚊銀咁上下圓周就夠，放少少鹽入D水度，水滾就放意粉，意粉可以彎身浸係水下面就加蓋，滾多幾滾就收火，由得佢焗一陣，夠你自己啱口味既軟硬度就撈起佢。記住，我係冇過到冷河既!

記唔記得呢款菰呢?



我嫌佢用油浸住太油膩，就放佢入頭先夾起意粉後剩底既熱鹽水度沖洗下，再過下清水添。跟住?我冇洗到隻鑊仔呀。係，我係由頭到尾用緊同一隻單柄易潔鑊去整既。

泌完水既菰照留係鑊度，開火，加橄欖油同蒜片爆香。

倒埋D蝦入去，兜幾下，加蓋焗幾十秒。 

D蝦彎弓晒咯，就可以放埋頭先撈起既意粉入去兜炒架啦。

兜多幾下就可以炒勻架啦，上碟，食得!



我一氣呵成，D意粉撈起冇幾耐之嘛，仲係熱既，所以唔駛擔心炒得唔夠熱既問題。

有冇發覺我冇再放調味呢? 

本身已經用咗鹽水烚意粉，所以意粉已經有味，海蝦仁加咗少少魚露，好夠味架啦。

真係唔係嚇你，計埋烚意粉同洗切時間，幾手腳慢都好，我十五分鐘以內，一定煮好呢碟色香味俱全既意粉既。