大維修

沒完沒了既屋苑大維修，終於都差不多到尾聲。擾擾攘攘咗幾年，投完標，定到維修項目同大方向後，又有一批人出黎搞事，想推翻個業主立案法團。中途又流會又再定日子開會，又出禁制令，先可以開到工。

好啦，最後人地搭棚開工，又有異見人仕搵人黎搗亂，阻止工人開工，搞到成日要驚動警方出動。

大家都知就咁噴野係外牆面，再油靚佢，係唔可以維持好耐既。但既然一早決定咗係咁，就要繼續架啦。每次開會都有通告既，鬼叫你地唔一早去反對咩?



先油灰色底油，再油白色，然後先到粉色系面漆。

我地大大話話十座樓，每座44層，一層八個單位，3,520戶，真係人多口雜架。

做得呢d工程，就預咗要長時間忍受開唔到窗既日子。

屋苑樓下既遊樂設施都要暫封

平台就好似地盤咁，長期有棚加搭建

睇住d樓一座座咁完工，我地都好開心既。

真正開工到完成，都花咗年幾。

大家就係咁忍住出入既唔方便，繞道而行。

唔方便既日子終於都過去，睇下小朋友既休憩處幾靚!

依家又輪到我自己屋企玩裝修啦。搞親呢d，都係要啪下驚風散架啦，實在太多因素我地控制唔到，希望順順利利啦。