在淘寶訂窗簾

以前成日聽人講話去羅湖城車窗簾，我都唔多願花時間上深圳氹一轉。之前朋友話我知窗簾其實係可以上淘寶搵既，咁我就上網睇下，呢幅布料就好啱我心水啦。綿麻質地，$36人仔一米。但礙於覺得自己唔知點度尺寸，一路都下唔定決心去做呢個動作。

原本諗住係香港車窗簾就算架啦，三千幾就三千幾啦，俾少少錢人賺啦。但係睇完一間店，個店主只係sell埋D百幾蚊米既布俾我，仲要揀唔落手，唔啱心水，所以冇即時卜鎚。

心中念念不忘呢幅布料，又突然醒起早前訂鋁窗咪有份稿既，有齊尺寸架喎，咁就易搞啦。

有咩唔清楚，其實可以同店主直接對話，問清問楚。最好有尺寸同埋有實物相片俾店主睇。

咁就唔好有誤會，好似我呢隻窗咁，分上下兩塊既，就好清晰啦。

呢兩間房既窗，我都係分上下兩條既。

而廳呢，我就想一塊過，所以就自己度尺寸俾佢。

再自行決定窗簾到底想幾長，我呢，就唔想咁長，過咗窗台少少就夠(但大家最好就做長少少，因為窗簾掛起後會成波浪形，長一點會較好)。

呢度係廳既窗

你地估下車晒上面幾度窗簾要幾多錢呢?

係$381人仔呀!

加埋五十幾蚊快遞費到中環公司地址收貨，兌返港紙都係五百幾唧。

我日頭影既，背光，所以就好似黑孖孖咁。

其實佢係好襯我地既家具既，所以我都幾滿意。

只差在氣窗果兩條窗簾短咗D，如果長返五厘米，就完美啦。