四季豆肉絲炒烏冬

之前果晚冇煮飯，一早起身，見有時間剩，就整少少野做午餐啦。

咪成日以為整野食好花時間得架，我就計時俾你睇。

我沖涼之前就浸咗豆架啦，跟住洗洗佢，搣開幾段，好快既唧。

肉呢，就事先已經預備咗係雪櫃架啦。又係就咁用韓國烤肉醬醃既。

仲有一包即食烏冬

懶人大法開動，放D豆入鑊

加少少滾水，煮一分鐘

連埋D水倒佢出黎，由得D熱水繼續將D豆進一步自煮

因為用咗韓式醬去醃肉，基本上連起鑊用既薑、蒜我都慳返啦，就咁用少少油就去炒肉就得架啦。

跟住就放埋包烏冬入去

將D豆同部份既煮豆水加入(千其咪加晒D水呀，你都唔想水汪汪架)，好快就可以打散個烏冬架啦。

加D鹽、老抽去兜炒，好快就搞掂。

簡單既午餐已經預備好啦，可以裝盒。

順手洗埋D碗筷同鑊，只係用咗十零分鐘。仲有大把時間梳頭，執拾，預備出門返工。

咁冇人話晚餐唔可食D咁野架喎，一人前，份量剛剛好。大食既，咪放多一包、半包烏冬去炒咯，材料既野，豐儉由人，想懶D，連肉都唔放，加多少少菰呀、椰菜之類既菜蔬，用XO醬去炒，一樣可以食得飽飽架。