又一個新嘗試，今次，我想改雕一些優雅點的人體姿態。
談到優雅，芭蕾舞蹈員的姿式，大家總不會陌生吧。
若乾做影子，姿勢定要簡單，又要能顯示身段。試描了兩款，不是太大，就是太難。可不想一下子浪費一大塊橡皮呢(講到尾還是孤寒病發作)！
描個小一點的吧，手指位又變得艱澀，不好辦呢。
好不容易選定了一個姿式，亦決定了花落誰家。仔仔細細為物主雕好了簽名，小心地勾出外形，逐步進發。怎料．．．
雕到差不多完工，只差頭部及一隻手，一個閃失，頭部削去了一截！
啊！！！！爸爸及Bibi只聽到一聲驚呼。
不、不、不！不可放棄！就改改髮型吧，頭部可向後昂一昂，沒有頭飾也不打緊啊，誰會猜得著曾經發生意外呢？
初稿, 手要改.
修一修, 又好一點.
不敢再落刀, 怕要截肢, 始終都是新嘗試, 下一個再做好一點吧!
呵呵！心癢癢，還是喜歡做迷你手作。
既然可以雕幼細的線條，幹嗎不可以做幼細的小印章呢？
牛年啊，就再刻一只小牛牛吧。
剛蓋出來的第一印, 有少少瑕疵, 字母要修一修.
大家覺得這小牛可愛嗎？
修正一下, 搞掂! 呢個最細既包裝袋都大得滯添!
大家可知道網上有一位甘夫人？她可是令人佩服的長輩呢，可謂入得廚房，出得廳堂。我既欣賞她的花藝，亦敬重她能跟上時代。論此等年紀，能夠保持在網上跟大家交流的前輩可不多見呢。
知道甘夫人最近添了一名小孫女，成為了甘家的新寵，亦是眾人的心上肉。
可記得我之前教過大家：對身邊的朋友好，只要對他們最關愛的人好，朋友自然會快樂，比你直接對她／他好，更窩心。
所以，我今次特意為甘夫人的小孫女雕了一個名字印章，祝願她快高長大、精靈活潑。
我特意選了一隻可愛的小狗，亦讓自己挑戰難度，要雕出一個好像描線一樣幼細的印章。
約了舊同事吃午飯，正好跟她們分享我最近的新嗜好。
K小姐曾在我的公司做見習生，後來正式掛牌當了律師，當年我可是她的臨時媬母呢！我們可真有緣，連結婚紀念日也在同一天。
B小姐是K小姐後來的秘書，離職後我們常在facebook保持聯繫。
兩位數年前分別蟬過別枝，早已自動轉帳成為我的舊同事。
剛好這幾天復活節假期構思了這一隻小綿羊，就動手雕了這一對橡皮章送給兩位好朋友。
別輕看這小綿羊只得一寸不到的大小，雕刻這波浪形的毛球狀，可得花上好一段時間才能完成呢！
雖然不喜歡刻重複的圖案，但只要改改步姿，就會有些微變化。來日再為牠變變身，又可以雕出其他造型來。
不過，我知道沒有一個印章是完全一樣的，因為羊兒身上的毛都是我隨手畫的。哪會這麼巧呢!
為了答謝幫Bibi補習中文的老師，我打算為她雕一個名字印。
素知她喜歡愛麗斯夢邊仙境中那隻會隱身的貓(Cheshire Cat)，我先著她簽個大名式樣，再拿回家研究一下。
老實說，草圖早已描好，但遲遲未願動工，這圖樣對我來說可不容易啊！
一路拖延，把手頭上好幾個趕著送人的印章做好，才把心一橫，著手雕這個「大」工程。
花了一個下午，一take過完成後，心裏暗歎一句：「簡直是一件藝術品呀！」除了簽名中的第一個“ｌ”字母失手刻得幼了點外，整體來說尚算不錯。
正好趕到13/4，Bibi補習中文的日子送她呢！
因為曾當著這位老師面前刻過影子橡皮章，所以她收到這個複雜的印章時，驚喜不已。
就是因為這張笑臉，問我：覺得辛苦嗎？
我說：值！
還會再刻一個這樣的橡皮章嗎?
見過鬼, 還未怕黑嗎?
差唔多兩個月啦，總算叫做幼稚園修業啦。
做個咩印仔去紀念下好呢？
就再雕隻牛牛俾小甥孫女Hayley啦！
有時ｄ野係要逼出黎既，突然間想做就做，期間都有一節小插曲。
我係一個盲盲地既傻人，畫完草圖，好滿意，轉印之後亦非常清晰，但除咗副con，諗住落刀架啦，點知果陣先發現塊擦膠原來有好多瑕疵架！
天呀！唔係啦掛，我都cut咗塊野出黎咯喎。好慘，唯有再畫過一只先雕啦。
每次雕名字印，我都會刻好個名先，我唔想衰收尾，搞到要剷走個名。因為如果只係個公仔出咗事，我都仲有可以臨時改變圖樣去就返，但名就冇得傾啦。
不容有失，仲係諗住用黎做修業作，梗係要更小心啦。
終於都刻好啦！又拎返之前果塊擦膠黎睇，想為佢默哀一下。望多眼先知，原來所有瑕疵位，都係將要剷走既位置黎，根本第一次就唔駛放棄佢，走去整過塊！
第六、第七位同我見面既網友係華姐 同二少奶（即係Sister Lam）。
今次，我地去咗灣仔既留園雅聚食上海菜。果度環境算ｏｋ，唔太嘈，食物一般啦，冇開飯啦網頁講得咁好，或者我食過更好味架啦。
見到我真人，據佢地講，我冇佢地想像中咁大。呵呵，即係話我仲「後生」啦！華姐都唔係幾信我大過佢呀，嗄！你估我話自己「入廚卅幾年」靠嚇架。
我送咗一對兔仔印印俾佢地，希望佢地兩姊妹一路都咁好感情，亦希望佢地既囝囝囡囡日後長大，都可以好似依家聯繫得咁好，一代一代延續落去。
好多謝佢地送咗呢ｄ和果子俾我，返到屋企，即時就地正法，一次過毀滅晒佢，留隔夜冇咁好食架麻！
不過，我最欣賞既．．．都係盒入面呢張牛油紙呀！
臨近復活節，又是製作復活節賀卡的時候了。
慳家的我，自然又用上了環保物料為大家搞搞新意思啦。
今次向大家介紹呢本隨南華早報附送的某名牌領帶的宣傳刊物，以我對環保物料的觸角，第一時間知道這可是一本寶貝啊！立時收歸國有，避免我個傻老闆一個唔覺意禮手就掉咗。
你地睇下，領帶既圖案幾咁細緻，仲靚過花紙呀，基本上用黎做迷你野都好合用。何況．．．我係打算用佢黎做復活蛋架！
你地睇，我一早就整咗兩個印仔架啦。線條唔駛咁複雜既，本身蛋上既圖案已經夠靚啦。
我孤寒麻，所以只買咗兩種粉粉，一款透明，另一款就金色。金粉做出黎既效果都唔錯，但因為我生手，所以驚驚青青，整得麻麻。
等我剪晒ｄ蛋蛋出黎先，場面都幾可觀架。
暫定既設計就係咁既，但到你地手可能就會有ｄ出入架啦。事關呢，初初就想一張卡五只蛋既，跟住好似唔係幾夠數，咁就少只唔少啦 .
咦，又好似再少一只都仲得喎，唔係點夠分呀? 所以有d只得三只蛋，冇計啦，唔係我唔錫大家，僧多粥少麻. 今次向隅者, 只好等下一水先有啦.
就係度祝大家復活節快樂啦！
