早餐好去處 - 見一麵

上個月，有朝同Bibi去咗呢度食早餐：

＄２１一個特餐，包一碗粉麵及小吃加多士飲品等，十分抵食．

我同Bibi都揀咗豬腩肉紅薯粉，撩到亂晒先記得影相，ｄ肉係晒下面添．

豬腩肉已經瀉晒油，唔肥膩既．最得我心既係佢既熱度，我俾一百分呀！

熱度夠既食物，代表安心，我腸胃咁弱，都係食ｄ滾熱辣野安全ｄ．

Bibi配朱古力厚多士及日式餃子，我就要咗油菜同油多．

剛過去的星期日，我地又去幫襯，加咗一蚊價，食物款式都多咗選擇．原來早市同下午茶時段都係$22，午市就$26．以前係全日供應，家陣就分時段收費，即係變相加價，而且加得幾多下喎．咁家陣搵食艱難，如果佢食晏都只收廿二，又係難維持既．

不過，揀紅薯粉，米線，生麵等都唔駛加錢，算係咁啦．其餘既早餐組合，價錢都算合理．

今次，我要咗時菜金菰紅薯粉，一樣咁夠熱，即係佢地廚房做得好啦．

加埋香茅豬扒同油多，豬扒好似幾油，我係ｄ熱湯度浸下先食，都ｏｋ既．

Bibi呢，可能佢少食餐肉，所以佢竟然要餐蛋生麵．

配炸魚柳同朱古力厚多士，今次既朱古力醬就塗得認真ｄ啦．Bibi話ｄ魚柳咸咗ｄ．

仲有好立克同奶茶，都幾豐富架．我最鍾意用呢種杯，食晒ｄ野飲，杯野都仲係咁夠熱．

$44，以食物水準計，算抵食啦．

下次真係想試下佢既豬潤，唔知正唔正呢？我見到隔離檯熟客要咗豬潤米線同雞翼尖加多士，應該都唔差喎！