雞粒豆腐

又一個簡易版食譜，煮製全程連埋影相同切野，應該唔超過十分鐘（事關冇野要洗）．

盒裝豆腐，我多數選用硬豆腐既．咁點處理佢先為之快．靚．正．呢？

開封後，就咁用刀垂直劃三下，再打橫劃四下成方柱．

反扣上平碟

把刀打橫成水平，係中間位片一刀

就變成咁，將膠兜吸返上去，要完全兜住晒ｄ豆腐喎．

再反轉，咁佢地就會乖乖留係豆腐盒度啦，放埋一邊先．

拎兩條我之前介紹過既有味雞胸肉串出黎（可參閱：清真雞柳串），大家見到啦，未解凍既．

取出竹籤，切粒備用．嗄？咁硬點整走枝竹籤？打直切，由闊ｄ位果邊開始落刀：第一刀切一條肉出黎，第二刀近住竹籤邊落刀，另一邊又切一條出黎，咁中間既部份就好易削（tun）ｄ肉出黎架啦．

（如果你地冇呢ｄ調咗味既雞柳串，就要用普通雞肉代替，並且要自行調味．）

拿，因為硬硬地切既，所以粒粒都比較四正．

用滾水略為煮下ｄ豆腐粒，可保持顆粒完整，又可縮減炆煮時間．

隔水備用

我咁鬼懶，冇洗到鑊，就咁倒清晒ｄ水，就加薑片同油爆雞粒．

雞粒差不多熟，就可以加豆腐，再加少少蠔油同鹽，然後再加大約四份一碗既水．

滾起之後，翻拌一下，令調味均勻，略煮一分鐘就可以起菜架啦．喜歡食蔥既，呢個時候可以加蔥粒．

唔駛打獻咩？

你地睇，仲有咩汁唧，唔打都得啦！

拿，實驗證明，預先淥過既豆腐粒，煮完仲好靚仔架．