我家的貪靚爸爸

見過爸爸個樣既，真係唔會估到佢咁姿整同貪靚既．每次人地送咩好野黎，例如珍珠面膜，羊脂謢膚露等等，如果俾佢發現，都唔慌長壽，因為佢係會唔理三七廿一，一大pad咁用黎搽腳既，你地咪想像下ｄ女士淨係要用黎搽面既野，俾佢咁糟蹋法係幾咁肉尺，所以成日搞到Bibi要收埋ｄ護膚品．

咁啱Bibi去完O Camp拎咗ｄ黑頭貼返黎，爸爸用過之後就立即愛上咗，仲要我買ｄ返黎繼續玩添！



呢款男士專用既都唔係間間有得賣，我就梗係係佢特價十八個幾兼買兩盒有八五折時入貨啦．

冇錯，只係貼鼻既下部

之前版本係白色既，新版係黑色既，會令到ｄ黑頭油脂撕出黎時更明顯．

呢幅圖講得好清楚，事業真係應該咁既．

但要點係要用熱水洗乾淨個鼻，等毛孔鬆開，趁個鼻仲濕時貼上．

爸爸每次都要我負責幫佢貼上鼻，我就趁機搣佢個鼻，虐待一下．



撕開膠貼時就由左右兩邊開始撕起，跟住就會見到ｄ固體狀既油脂，好似箭豬ｄ刺咁，伏晒係塊黑頭貼度，效果十分明顯．

爸爸就係覺得好好玩，所以每星期都要玩一次．

事實呢．．．，睇返佢個鼻頭，用過呢ｄ東東之後，毛孔真係收細好多，黑頭亦光滑好多．屋企有青少年男孩既家長要留意啦，有需要可以考慮下．

不過，女士就咪亂試啦，分分鐘只係將鼻面既細毛粘走晒，唔會好似ｄ男人用既效果咁好架．