冬至點過?

皇恩浩蕩，今年冬至，下午全公司去怡翠軒食飯，跟住就可以散水啦！梗有食唔晒啦，我打包咗鴛鴦雞同清炒桂魚絲，加埋五隻蛋撻仔．



飯後有抽獎，我得到呢份．一睇，細細份，好吖，就算用唔著都唔阻掟麻！

跑車黎喎！其實佢係指甲鉗．

有另一檯既同事都抽到呢樣東東，但全檯人夾手夾腳，都搞佢唔掂，佢架跑車開唔到呀！掙扎一輪，最後連條波仔鍊個扣都甩埋．佢地全檯都話：開唔到既，要回水呀！

臨行前我同個物住講：你將佢交俾我啦，等我返屋企同你對照一下，試下可唔可以研究到打開既方法啦．後面冇咗條鍊果架，係我同事既．

佢架車原來甩咗車尾既彈弓，而負責包裝出貨果位可能監硬將佢閂埋，所以開關閘應該已經失靈，我用枝十字螺絲起子係車頂度借力向後一推，就開到啦，但如果一閂埋，又要用返工具先可以再開到．咁你由得佢打開啦，起碼都用到吖麻．

睇下兩架跑車既英姿先！

之後，我同一位係公司做咗好多年既同事去散步，傾下計咁，真係做咗咁耐同事，講得最多野都係今日．

再去奧運站呢間標榜用天然米漿做麵包蛋糕既店，拎返兩個團購既一磅庄聖誕蛋糕．

一個朱古力蛋糕

一個鮮果紫米蛋糕

送去以前湊過Bibi既嬸嬸屋企，齊齊食蛋糕．嬸嬸仲煲咗渣咋我地食，又食鳳凰卷又飲茶，問我地係唔係度食飯喎？都飽啦，唔好客氣咯．



所以，晚上的冬至餐就只飲了中國湯＋鴛鴦雞＋迷你杯麵！

Bibi話：冬至要食杯都夠慘架啦，仲要係迷你既！

喂！我有話煮飯你地食架喎，係你地話唔餓之麻！