食玩壽司

有位小妹妹送我玩具，真係好啦! 我最鍾意玩新野架啦。




佢係零食黎，係真既食玩呀! Bibi見到，咦，好似幾好玩喎，你要等埋我一齊玩喎。



我: 嗄? 你又要返工，又要返學，又要做功課，幾時先得閒呀?

Bibi: 唔知架，要睇心情架。

我: 有冇搞錯呀.......

冇得玩住，就睇下個盒先啦。

首先，係教你點整舊飯。以我失憶咗卅年既日文程度(即係近乎零)，嗄，要加水? 入面有冇提供架? 用隻匙去打圈咁攪就掂? 係咪架?

跟住到整蛋咯喎，又要先加咗水，先可以加蛋粉。再用匙搞勻，然後整平。

第三個步驟係做金槍魚(吞拿魚)片。

做軍艦壽司用既紫菜

最複雜應該係三文魚子啦掛? 真係要搞清楚，有D野係要先加粉，後加水既，而呢個呢就要先加水，後加粉。再用吸管抽起B溶液，再滴入A內。情形就好似廿幾年前出既滴滴樂一樣，又係滴落水度變珠珠既。我仲記得當時廣告係用普通話唱既: di di le......

原來D蛋同吞拿魚等三分鐘就可以成形架啦，翻起然後夾埋，疊上舊飯度就得啦。

軍艦壽司就看圖都唔駛識字啦。不過最搞鬼都係連醬油都要整埋，仲話加埋醬油食好味D? 唔係啦掛? 我敢唔敢放入口都好成問題喎。



哈，唔知入面係咪有埋呢塊板既呢?



我相信佢都驚大家搞唔掂塊紫菜，所以俾埋圖示你。

仲有提示可以做混合款式，我都好擔心搞唔掂D質感。入面D材料係咪真係夠整四件壽司架?



等咗個幾月，終於都等到Bibi得閒玩啦，開出黎係有咁多野既，黑色果塊係黑加侖子味既軟糖黎．我點知? 因為我有偷食吖嘛。

先做飯糰，好明顯，係唔可以做到幾舊既．開出黎，係香噴噴既梳打味．

我地咁慳家，就縮細佢，做多幾粒出黎啦．我見Bibi係度攪緊飯，我咪做定紫菜先咯．佢竟然話我偷步唔啱喎．

做蛋果陣，可能放得太多水，都照咗指示落架啦，都係太稀，唔可以成形．到咗做吞拿魚啦，咪放一半既水咯，都係唔得．



Bibi話，既然ｄ蛋係咁咯，咪當係希靈魚子壽司咯．

係咪有似曾相識既感覺呢？今次呢ｄ真係食得架．

好啦，最lau gou既一個步驟啦，做魚子粒粒．個嗞嘴咁大，想整細粒ｄ都唔得．

我監硬擺上去，都唔覺既．但魚子咬落係有醬爆效果既，都幾得意，絕對有滴滴樂效果．

我後尾用保鮮紙幫ｄ吞拿魚定型，放係粒壽司仔上，都ｏｋ既．

蛋壽司始終都唔似樣，我俾咗爸爸食．Bibi係有整豉油出黎既，但我冇點過，都係食返原汁原味好ｄ掛？唔記得問佢ｄ豉油咩味添！

下面果粒未放材料係頂既軍艦壽司係Bibi做既，唔關我事架．

總結一下：呢ｄ玩具絕對不適合兒童玩，係成人玩意黎，真係要ＰＧ家長指引先得架！我係玩既過程中，都洗咗好多次手先可以整到咁企理架．