今年第一個聖誕派對 + 慶比聚

為免約唔齊人，華姐一早吹雞，約大家在華府BB蕉。

我一如以往，約實有人在太和火車站會合，就座定粒八，自己會順利去到。

一個鐘以內可以到既距離，我習慣提早出門口，所以預咗一個鐘頭三個字。係車站企落冇耐已經有小巴，坐定定之後就開始玩電話。中途都係我熟口熟面既站，陸逐上滿乘客。車到總站，大家都要落車，點知當我抬頭一望，咦.......，呢度邊度黎架??!!!

唔駛問阿貴，我實係搭錯車啦。硬住頭皮問司機大佬: 我係咪搭錯車呀? 請問如果要去上水火車站應該搭咩車呀? 司機大佬一指，你去對面等17號小巴啦，係巴士站隔離架咋，對面線先係去上水既。

哦......，戰戰兢兢落咗車，到底我去咗邊呀? 經過一巴士站，寫住落馬洲! 死得! 仲有半個鐘就到預約既時間，要遲到啦! 要搭紅VAN，死啦，我身上冇散紙架，得兩個幾，雖然有得找贖，我好似得五百蚊紙咋喎。好彩最後都揾到張廿蚊紙唧，上車果陣，請司機提我到咗上水火車站提我落車。點知司機話: 總站落啦! 賣葛啦，咁落咗車又點行去火車站呢? 終於問到人，果位大叔非常醒目，講得清清楚楚，我好快搵到火車站。

枉我係上水既青少年中心教咗成個暑假，原來我除咗由火車站行去天平村既路外，另一邊既上水既路，我係完全冇行過架。

好不容易先去到太和站，只遲了一兩分鐘。買埋蛋糕，等埋阿比，就出去同華姐會合。(後來Bibi打俾我，我先醒起自己有幾蠢，做乜唔曉係落馬洲坐火車去太和? 爸爸仲衰，佢仲Whatsapp我李家仁醫生果隻歌仔黎潤我添。)

今次小青蛙話明要膠級食材，所以我地既食物如下:

大花蝦

 

鮑魚

加埋蒜蓉香草牛油去燒，正!



大蜆

一隻隻開晒口，入面既水滾到卜卜聲。

蟶子

大鱔

加埋燒汁，由小青蛙主理

西班牙黑毛豬扒，日本A4和牛。

和牛燒完係咁既，呢樣野唔關我事既，我係唔食得既。

仲有羊架，又係唔關我事既。大把野食，食少一兩樣都冇乜所謂啦，我一定唔恨既。



仲有小青蛙醃既香草雞翼，以及好幾款德國腸。



仲有下面呢D，同後來大黃龜龜出去加碼既丸丸同芝士腸仔。大家留意左邊果包棉花糖，係用菲律賓芒果整既，又香又好味架。

好多謝小青蛙帶晒佢D調味料黎，佢話靚扒唔駛醃既，燒完加D香草海鹽都已經好好味。呢盒黃色既係香草蒜蓉牛油黎。用黎搽面包去燒，好好味架。

呢D係"好歎"，可以燒到個火好旺。



睇下，幾勁! D食物可以好快燒熟架。你地估我食咗幾多野呀? 四隻雞中翼、兩塊豬扒、兩件鱔、一隻蝦、一隻蜆、一隻鮑魚、兩塊方包、兩條幼德腸、兩條小芝士腸同埋一粒棉花糖。



食完大家就玩交換禮物

睇下D小朋友幾開心。

呢個算係阿比既生日蛋糕，因為我地係順便當埋聖誕派對既，所以就要咗呢個款式。

阿比，生日快樂啊!



好多謝大黃送我地去火車站，所以我地十點四就去到火車站，我十一點半就返到屋企啦!