Dinner buffet @ The Place

上月Bibi生日，我地黎呢間餐廳食自助餐。自助餐時段為6:30-10:00，我倆放工都搞到成七點半先去到，無所謂啦，反正都唔食得幾多。

係咁意巡一圈，冷盤既蝦、青口、小龍蝦、生蠔、螺、長腳蟹等，我都唔好既。

飯局太多，我都怕食壞自己。壽司、沙律、煙三文魚、凍肉我都冇掂過

呢檔麵食我反而幫趁過兩轉，要咗灼生菜。

鵝肝多士，我拎咗一件，兩份食，驚食滯。

海龍皇湯唔得，太咸。雞絲素翅反而唔錯。

蜻蜓點水式咁食咗D魚生，一件波士頓龍蝦鉗、少少蒸魚、兩件燒腩、一粒咖哩蝦仁、兩隻天婦羅蝦、一粒螺、一粒芝士麻薯波、兩條小棠菜、一啖糯米蒸蟹、兩碗素翅。

平日食自助餐我好喜歡飲湯同食包既，但呢度既包冇得整熱既，所以我冇食到。羊架、威靈頓牛柳、燒牛肉等都唔係我杯茶，唔多關我事。生蠔我更加唔會食，所以我食自助餐係明蝕既。

呢度既甜品選擇頗多，但我下午剛食完文華黎，又點會睇得呢D上眼呢?

反而Bibi食咗一陣野，就開始攻甜品啦，佢將所有甜品放晒係一隻碟度，方便影相。呢度全碟，最好味既係果杯雙重朱古力脆脆，士多啤梨奶凍都OK。其餘既都係普普通通，以我既標準就係B-級別，當中果粒紫色有朵花仔係上面既，係紅桑子味，算唔差既。

朱古力噴泉我就唔玩啦，雪糕櫃反而比較精彩，味道較有特色。我點咗啤梨雪芭同青檸雪芭，後者微酸，清新可人。

連加一都要成六百幾蚊位，絕不便宜。俾得起咁既價錢，倒不如去新世紀既花月庭食好過，食物種類會多好多，仲開心D。對Bibi黎講，呢度並不適合佢，應該搵間甜品正D既，例如紅磡海逸好過。我應該唔會再幫趁呢度啦。

對我黎講，日式放題更適合我，較多熱食，而且食物會新鮮D。