收到假銀紙?

某日放工搭走鬼村巴，因車上冇八達通，為咗加快效率，負責睇場既大姐就先逐一向各人收取車資$20。

輪到我時，我就從銀包內抽出一張藍色紙幣繳上。眼利的大姐旋即退回道: 你呢張咩錢黎架?

嗄? 睇真D，係喎，有100既字既? 早前咪傳過人地用咩落後國家既低幣值銀紙去呃人既? 唔通我又收到張咁野? 

滴晒汗下，即刻換過一張交出去。唔好意思呀，我都唔知人地幾時當廿蚊紙找俾我架?

再睇真D，有Macau既字喎，唔通係澳門既$100? 睇黎佢真係如假包換既澳門錢喎，前面排隊果位乘客話: $100當$20找俾你，你咪好著數! 咁又唔會喎，以我咁懵，咪一樣當$20洗返出去，只係俾果位大姐退返黎我先知唧。

爸爸剛出咗九巴兼職份糧(係呀，佢依家逢假日都會去渣巴士架。)，我每月都會選一個受助機構，將呢份散工得返黎既人工捐出去既，今次就幫下D長者啦。

咁就加埋我果張無厘頭既$100上去，一齊捐埋出去啦。

順便代果位唔小心拎咗張$100出黎當$20洗既人士做返少少野啦。


果張銀紙我就留返佢做個紀念啦!