呢d係乜東東？ 哦，咪就係人地果d印咗舊地址，唔可以拎返黎用既廢紙咯！
摸上手，都幾爽身架，透透地，唔太薄，我仲以為係整白兔仔燈籠既馬拉紙添！睇真d一原來係洋蔥紙黎架喎！仲係來路貨黎添，乜咁冇陰功冇人要你地呀？
等我黎啦！裁走果忽唔出得街既部分，然後幫佢地化下裝，搽返d"胭脂水粉"，再將佢整成禮物袋．呢個係試驗品，冇QC到既，手工麻麻！嗄？做咩用粉紅色？因為所有印台都因為搞義賣活動，拎晒返公司，未回歸，得呢個色係屋企咋！係就係娘咗ｄ，咁都冇辦法啦．
拿！睇落都唔失禮呀．我將佢用黎包咗份小禮物，俾送呢d紙俾我果位朋友，佢都唔認得呢d紙就係佢地諗住掉既孤兒仔呀！
所以話唧，想掉野之前，停一停，諗一諗，或者山雞都可以變鳳凰架！
上星期日, 我老闆走咗去步行籌款, 支持下d婦女團體, 第日就拎咗一大袋野返黎俾我啦.
手帶, 手繩, 胸章，全部都係好Lady既野，步行當日，大會指定要dress in pink，唔知佢係咪就咁整件粉紅色Polo就算呢？
沐浴露, 洗面奶, 潔面膏, 消毒液, 止汗劑, 粟米片, 濕紙巾, 香水, 除縐及除黑眼圈既東東, 都咪話唔多樣化.
最重就係呢set護髮洗髮露啦，難為佢肯拎返屋企，再拎返黎公司俾我．雖然唔係樣樣都啱我，但都好多謝佢咁有心．
係公司，佢係我老闆，我係佢．．．．．．
阿媽呀！陰功！
因為佢成日都"Yes, Mum!"既．有時問我俾Ｄ咩佢食？我一時間唔知英文點講，就會話：總之就係有益食物啦！咁佢就會乖乖地食咗佢架啦．
除咗足球，網球，籃球之外，係香港七人籃球同木球，都好受外國人歡迎．
香港有個木球會，相信好多係度住既外藉人士都會知道，會費都唔平，又要朋友推薦．
有人訂造咗做呢對Cricket Twins，俾兩個小朋友，佢地既老豆s見到，一定好高興架啦！見唔見呀？我用咗爸爸辛辛苦苦鋸既木仔呀！
老豆s? 係呀, 佢地係來自兩個家庭架麻, 我仲知其中一個老豆, 玩緊呢種運動添!
我都幾鍾意買零食架，dark choco尤其是啦，Royce同Godiva就更加難抗拒．聽講今回Royce既士多啤梨朱古力, 要等到農曆年前先出喎, 真係頸都長啦.
不過，我都經常買ｄ其他品種黎食下既，少甜既黑朱古力加埋原粒杏仁既，就比較少見，而且價錢非常便宜，只係十個零幾唧．
開黎食，味道唔錯喎，但唔覺少甜既？質地都幾滑，睇真ｄ，係我地由細食到大既Vanhouten金鷹朱古力呀！唔怪得啦．
再黎，就係呢款紅豆朱古力啦，又係平平地，十蚊咁上下．
開黎睇下，金光閃閃，都有成廿粒架．
拆開張包庄紙，面頭係紅豆味，底層係黑朱古力．
我就覺得用舌頭先食咗紅豆味果一面，再嗒黑朱古力就差唔多，撈埋黎食，其實味道唔係太夾．
呢ｄ卓頭野，又呃到我呢個傻人幫襯佢啦！
今次Charity Bazaar，好多謝幾位網友的支持，山長水遠來跟我打打氣，令我沒有那麼多時間拍烏蠅。但亦很抱歉，沒有時間跟大家寒喧，冷待了大家。
今次義賣所得, 一半會捐俾兒童癌病基金, 因為無國界醫生都好等錢用, 所以另一半收款, 扣除成本之後就會捐佢佢地, 做緊急既救援工作.
有過經驗，就知道原來有很多東東是不用預備的。禮物包裝可以免、木手柄亦可以免(大家跟本不會介意沒有手柄)。最重要的是：其實只得一個人看著檔子是不可行的，還好下午網友Pri來了幫手，情況比較易控制。
由於不切合市場需要，想不到我這個專做粘土的，賣出最多的反而是即席雕刻印章和最新研發的磁石書籤。有人聽完我的講解後，竟對著我的迷你手作說：Too mini!大部份的外藉人士都是中年或以上的中產階級，不會欣賞迷你手作，奈何。至於印章，因為雕刻需時，亦做不了太多。磁石書籤在外藉人士眼中，反而很對胃。可惜我做得不多，有些只做得一、兩個，很快便沒有人們想要的款式了。
由於九成的到會者都是英語人，我這個半桶水英語都攀不上邊的人，全日也沒說多少句中文。連鄰檯的中國人，都是全英語對白的，沒法子，只好自動調頻。
謹此，再一次多謝來探班的各位，除了給予支持外，還讓我有說說中文的機會。
還有，要多謝Donny爸爸的墨寶，拼搏可是出自他的手筆呢！
P.S. 今日有一單蝦碌事件，有人訂了印章，要求刻字，但銀包不在身，可能是另一檔的檔主，她要求在印章上寫“Book Club”，怎知當她回頭時，我剛刻好。但我知這是一個讓讀書會使用的印章，便想方便她，特意為她加上手柄（沒有要求額外收費啊）。她問我可否發出收條，我說抱謙，沒有收條（其實我真蠢，可以叫她直接捐款到兒童癌病基金讓他們發收條麻）。接著她便說回頭再來找我，怎知就此去如黃鶴。令我不單花了功夫，亦開封了一個新印台。只好阿Q地想，或者她是來逛逛的，買東西買得太高興，所以忘記了自己的訂購吧。
為了這個Charity Bazaar，真的弄到天昏地暗。我只得一雙手，要準備的東西可多著呢！
除了安排租用場地外，更要著手製作各款印章、迷你粘土蛋糕及小物(好彩有批冬菰原本諗住拎去聖約翰座堂義賣, 但因為懶油顏色, 做咗一半停咗工, 冇拎到去, 依家就啱晒啦!)、書籤、心意卡及信封等等。我可不是一個摩打手，只好晚晚都開工啦！
至於大會要求捐出的一份手作，沒空再做新的，只好在自己私藏內割愛。最後一盆留給自己的紅掌，再見了！希望你有一個好主人。我到星期六，才為它找到一個合適的包裝呢．這麼小的一棵盆栽，真擔心人家說我小氣呢！
以為預備了上述物品便可以擺檔了嗎？可不成啊，接下來濕濕碎碎的工作才要命呢。
既要訂出備忘錄、入帳表；又要製作送給認購者的小小心意、打磨印章手柄（已奉獻了爸爸辛苦鋸出來的所有）；最令人煩惱的恐怕是預備包裝了。老實說，怎樣利用循環再用物料去將自己的產品包裝得漂漂亮亮，可不是我的強項。收過我郵件的朋友都知我的東東都沒有甚麼包裝的呢. 逼在眉睫，才在最後一個週末作出定案。
找找公司的廢料, 還有好些無人問津的Index front sheet呢, 早兩日見到影印房垃圾桶內的Index Sheet, 真的心痛, 怎麼大家連用來做草稿紙也嫌費事啊!
影印紙的包庄, 可不是好好的材料麼?
這是初步的設計, 加上大家拆禮物剩低的花紙, 還是到現場才執生吧!
雖然我的手作全都是迷你的, 原來加上各種用具, 要帶的東西，一個人是沒法搬得動的，只好向同事求助，懇求其中一位義士，陪我到梅夫人婦女會走一趟。(我還未開口呢!)
我的天啊！希望一切順利，不要手忙腳亂掛一漏萬，更不要一路坐冷板凳，門堪羅雀啊！
雖然我不是教徒，請為我祈禱！十月十五日, 不要在禱告時說錯日子啊!
兒童癌病基金網頁內所載之宣傳: http://www.ccf.org.hk/update.php
不知會否有人察覺此網站的呢?
Bibi返港台同學會聚會，得返兩老係屋企掙檯腳。
又到爸爸大顯身手啦！昨日食剩ｄ飯，我知今晚要食炒飯架啦。
睇佢切咗ｄ素雞丁、薑米，拎咗兩只蛋。咦？乜有素瓜片既？
爸爸：ｄ青瓜分開炒定放埋入去呀？
我：隨得你啦。（都費事話唔好啦，佢想點整就點整啦。）
炒完出黎，爸爸成鑊放上檯。
爸爸：包你食過翻尋味呀！
我裝咗幾匙飯入碗，食少少，味道ｏｋ喎。賣相都唔太差呀，但係．．．．
我：乜你落咗蛋啦咩？
爸爸：弊！咁點呀？
跟手倒返ｄ飯入鑊，再入廚房加蛋又炒過。(冇所謂啦，都係我地兩個食唧．)
呢碟就係加咗蛋既青瓜素雞丁炒飯啦！
喜歡素食既朋友就不妨試下啦，咁炒法都唔錯喎，但要買幼身有刺既青瓜會好ｄ，因為佢會乾身ｄ．
今次呢個印，真係超易做呀！
點解？
我用呢個印, 做咗一千零 "四" 大張萬聖節卡(當然啦, 卡面係唔一樣既), 放係十月十五號果日義賣(Charity Bazaar - 我終於都擺檔啦!), 有緣人, 我等緊你地架!
前個星期六, Bibi有節目, 去咗理大既開放日, 我同爸爸兩老就自己搞掂.
成三點啦, 我地揀咗屯市既Riso, 貪佢有爸爸啱食既野.
全部餐單, 主菜得雜菌蜜糖豆燴飯佢食得, 小吃就仲有多士, 南瓜湯同其他飲品, 糕餅佢都食得既.
爸爸既半份咖央多
南瓜湯, 咁就梗唔夠我地自己煮果d咁好味啦, 份量好細架咋, 張單仲話係大喎.
爸爸要咗熱柚子蜜, 我要咗藍莓特飲, 佢既凍飲好似思樂冰咁, 但一d都唔稀架, 味道都唔錯架. 凍飲係比熱飲正好多架, 因為柚子蜜沖咗熱水之後, 都唔係太熱, 如果唔夠熱, 我情願飲凍.
我既半份薯角, 老規矩, 咬咗一啖先記得影相
呢碟就係雜菌燴飯啦
我果碟烤雞燴糙米紅飯呢, 多咗條蜜糖豆既? 因為一黎到我見到d生豆芽就咋咋臨, 過檔去爸爸度, 點知佢又再搬返黎再加利息添!
一啖一啖咁食晒d野, 爭d食瓜, 下次都係同Bibi黎, 兩份食一個全餐, 要埋湯, 主菜, 小吃同甜品加飲品, 咁就夠啦, 一人一份, 實在太多啦! 都係我貪心, 叫咗兩個小吃同湯累事.
某日, 放工返去，爸爸煮咗青瓜勝瓜炒豆卜、煎素鴨、QK三色蛋、例牌素老火湯。
佢成只鑊上檯，一味話：「你睇下幾正！唔好彈呀！」
嗄？唔准彈？
我：「咁你唔好問我意見，我咪唔彈咯。」
咁碟三色蛋又點QK法呢？好可惜，我冇影到相，不過我可以用文字黎演譯一下既。
佢居然成隻皮蛋冇切開，就咁放上碟，加埋原個咸蛋黃同豆卜去蒸一碟所謂三色蛋，面頭又加咗大堆好似山仔咁既薑絲，不侖不類，我可以講咩喎？我初時見有一忽咸蛋黃突出水平線, 仲以為佢放咗粒白果入去添!
爸爸仲解釋話：「以前d人，用魚蒸蛋，面頭都加豆卜既。」
嗄？用魚去蒸蛋？仲加豆卜添？豆卜蒸魚就話唧？
我：「咩呀？未聽過，咩魚蒸蛋呀？」我都知有人魚片蒸蛋, 不過佢一定唔係咁意思既!
爸爸：「我講錯，係魚腸蒸蛋就真，面頭加豆卜。」
我：「喂！魚腸蒸蛋面頭果d係油炸鬼黎喎，老友。」
一路食，佢一路又問：「d蛋好滑呀可！」
我：「…….」唔好出聲，唔好出聲，我忍!
Bibi忍唔住：「唔夠我地果碟滑咯。」(參考: 咸蛋肉碎蒸水蛋 - 三餸一湯,白飯任裝)
爸爸：「你地果碟？幾時整架？」
我：「我擺咗上blog果碟咪係咯。」
爸爸：「我呢碟點會唔及得上呀？咪幾滑！」
Bibi：「嗄？你面頭有蜂巢喎。」
爸爸：「…….」
不過，老實講吖，其實放D豆卜去蒸蛋就真係WORK既，食味都唔錯架. 食素既朋友可以考慮下. 但係, 千其咪學爸爸咁款喎!
我終於都擺檔啦! 係花園道35號既梅夫人婦女會入面 (即山頂纜車站行上少少), 詳情如下:
日期 - 15/10/2009
時間 - 上午九時半至下午六時 (不過我唔知自己捱唔捱到咁耐)
入場費 - 十元 (大會係會捐俾慈善機構既)
我既檔口在Blue Room, 38號檯.
到時, 我會出售粘土蛋糕, 手作卡, 書籤, 印仔等等自家製東東既.
大家應該認得我d手作係咩樣架啦, 就算未見過我既真身, 都應該唔會搞錯既.
我都唔知自己d野有冇人hau架, 但未見官先打八十, 已經開咗張支票捐款當場租啦. 到時我將會用一半既收益捐埋出去, 另一半, 就用黎幫補我買材料既費用.
老實講, $, 我就冇啦, 但就要多謝Bibi既公公婆婆, 生就我一雙纖幼既手, 可以做出一些逗人歡心的小玩意, 係帶俾大家歡樂之餘, 仲可以幫到其他有需要既人.
咁到時你地如果得閒既話, 就黎探下我啦!
原本我唔敢出呢個post架, 我知大家多數都要返工既, 但唔做返少少宣傳又點得呢?
咁做會唔會俾人封blog架?
