素雞丁炆米

早就吩咐咗爸爸煲定白果粥, 等我放工返黎炒返碟米粉, 做我地既晚餐.

呢款超市有得賣既新竹米粉, 只係$7.9既唧, 一包八個, 三個人食, 用四個就夠啦.

用凍水浸一陣, 浸到佢拆得散就得啦. 呢隻米粉有度好, 就係唔會煮到碎晒, 而且可以保持爽滑

材料豐儉由人, 我用咗豆卜切絲

金菰, 去腳洗淨; 薑片

素雞丁切粒粒

先用油起鑊爆薑片, 係呀, 唔駛咁多油都得啦, 易潔鑊, 唔粘底既, 加半茶匙鹽

加金菰, 兜炒幾下, 加豆卜絲, 又兜炒幾下

掉埋d米粉入去, 加水, 又兜炒一陣

再加素雞丁粒粒, 又再炒下, 煮到稍為收乾水份, 但仲係濕濕地既, 唔係咩叫做炆米喎?

可以試下味同睇下d米粉硬唔硬得滯, 覺得硬咗d就再加d水, 唔夠味就放多少少鹽. 千其咪放豉油呀!

(豉油受熱有可能令豆製品食材變酸, 若食譜有需要加添豉油的話, 都只應在臨起鑊前才放, 明冇? 煮冬瓜, 節瓜, 冬菰等, 都係同樣道理)

一切妥當就可以上碟架啦, 係咪簡單易做呢? d米粉冇碎晒架, 而且又唔駛預先灼過同過冷河, 幾方便呀. 而且呢款米粉可以一早買定係屋企, 就咁用椰菜同鹽黎炒, 已經可以好好味架啦!

我之前果日, 用茄子, 腸仔片同台灣既罐頭肉燥炆過一碟, 令到冇乜胃口既Bibi, 即刻有胃口食呀!

所以話唧，材料由你定，萬變不離其宗，無論你係咪食素，只要放啱自己口胃既食材，都一定可以食到lam lam脷既！