萬聖節 - 魚缸

曾經有段時間，屋企成日都養咗ｄ魚，係爸爸既嗜好之一．

我就冇眼睇啦，佢最鍾意玩改裝，正正經經既水族器材唔用，大家俾足眼力去睇下佢用咗咩黎砌個魚缸：

黑色果舊，好似有好多只腳果樣呢，好似係沙宣既吹髮器其中一樣配件黎．

南瓜頭同南瓜屋其實係香薰爐黎，佢嫌人地唔夠多窿，ｄ魚捐得唔夠開心，仲走去開多幾個窿添！

見唔見南瓜頭上面仲有ｄ套房呀？係廚房用黎放鹽糖豆粉既兜兜黎，爸爸貪佢一格格，方便用黎招呼ｄVIP既．

藍色膠管粘住既，大家應該認到係十蚊店既收納膠兜啦．

見唔見右上角仲有件好似擦咁既野呀？係人地用黎磨手皮果Ｄ東東黎，我都唔知佢用黎做乜架？

魚缸前面，橙色果件東東呢，原本應該係用黎攝住只門既野黎，佢就用黎畢魚糧餵魚用．仲有Ｄ玻璃煙灰缸．．．佢買黎放鉗仔，魚網喎．

其實呢個魚缸左右，都仲有大大小小既魚缸架，右面咪有條好大條既花羅漢咯，見到未？

鬼咁撈較，總之就頭痕啦！好彩係唔駛我理既唧．

每次有魚仔出世，爸爸就多野玩啦，又用絲襪同筲箕做分隔，整個育嬰室，照顧周到，對人就冇咁好服侍啦．

就係因為佢養得小心，所以成日都有魚仔出產，送得既都送俾Ｄ同事啦，一竇竇既魚仔，佢地就開心咯，我就煩啦，又要帶佢地返公司分俾大家．

玩咗幾年，終於有日收手，放晒Ｄ魚，連魚缸都掉埋，安樂晒！