煮碟素齋去拜拜

重陽節，一早起身，要煮碟素菜去拜山．要簡單方便，材料如下：

冬菰，黃芽白，木耳／雲耳，雪耳，磨菰，素雞丁，薑片（其實放咩都冇乜所謂既，有乜放乜咯，只要唔放蔥蒜韭咪得咯）

冬菰：前一晚浸定，渣出少少水，加少少糖，撈勻，加少少粟粉撈勻，再放回少少冬菰水令之濕潤ｄ，用瓷碗裝住放入微波爐叮一分鐘（呢招係教煮素菜既導師教既）

木耳及雪耳浸半個鐘，令之軟身，沖洗後切成小朵

黃芽白數瓣，洗淨切成一段段約寸半長

我懶，用咗罐頭蘑菰，沖沖水，隔水備用

白果去殼去衣，用清水先煮五分鐘，加埋ｄ雪耳，木耳，素雞丁煮一分鐘；夾起白果，雪耳，木耳，素雞丁備用；再掉黃芽白入去ｄ水度，煮兩分鐘；夾起ｄ黃芽白；掉埋ｄ磨菰入去，滾幾滾，隔水備用．

其實我用黎用去，都係果寸零既水，唔駛好多架咋，最後先放磨菰，因為佢係罐頭貨，唔想有咩釋出既味道影響到其他作料吖麻．

步驟：

鑊內放油，爆薑片

掉白果同冬菰入去兜下

再放黃芽白，兜下，可以加少少水，煮一陣

加埋ｄ木耳同雪耳入去炒下（呢ｄ木耳係有機既，所以係薄ｄ既，口感較似雲耳）

放磨菰，又兜炒一下

呢個時候可以放ｄ鹽啦，放唔放素蠔就除得你，不過我就冇落到

加埋ｄ素雞丁炒幾下，我用返少少冬菰水開鷹粟粉打薄獻

喜歡既話就收火之後，放幾滴麻油，咁就好好味架啦．

因為樣樣都灼過，所以好快就煮起，而且都冇乜難度唧，睇落去好似好煩咁，但我浸咗ｄ木耳雪耳就走去梳洗，跟住處理埋冬菰，黃芽白等材料，加加埋埋都唔係用咗好多時間唧，但就有碟比較認真既素菜請我老爺，奶奶食啦，點都比買現成既素糕點去拜山強得多啦！