2009 Christmas Gift - from Michelle, Candy, Joey & 慕慕

半日安後翌日，返到公司就見到一大抽既禮物，咩黎呢？

原來係送俾Bibi既，一份令哈囉媽咪迷尖叫既禮包呀！我初初仲以為係張膠dun添！

裏面裝咗好多哈囉媽咪零食呀！多謝Michelle姨姨．

坐低食早餐，突然發現檯頭多咗樽咁野，原來係蜜糖黎呀，啱晒我啦今次！彩繩加木珠珠既包裝，又幾聰明喎，送俾我既同事Candy話專登唔粘實佢架，等我可以循環再用，係咪醒呢！

下午，又有禮物，今次係Joey送俾我架，佢都有玩粘土架，不過大家既類別不同，都好有趣架．

呢個相架頂癮哩，我都好鍾意．收到之後好感動呀．．．．

呢個應該係用軟陶做既吊飾掛？唔知我有冇估錯呢？呢樣野我只係圖書館ｄ書上睇過架咋！一係咁吖我教你刻章，你教我玩呢ｄ吖？

仲有一大疊七彩手工紙，出年朋友教會義賣情商我做卡拎出黎賣，材料有著落啦！係咪整定我爭ｄ乜，就會有人送過黎既呢？真係奇妙啦！

另一位Michelle既作品呀！十字繡呀！

我印象中，對上一幅十字繡已經係十幾年前做架啦，都係送俾人既，賣花姑娘插竹葉，我冇留返ｄ乜俾自己架．

除咗廿幾年前我家姐送我一隻肥豬，Bibi小學送我十字繡母親節卡外，呢幅算係第三樣特別為我而做既十字繡啦！開唔開心？梗開心定啦！

睇見ｄ字咁靚，我真係有ｄ滴汗呀．．．咦！好似係機印架喎！好喜歡呢種字呀，點整架？

每次寫野俾大家果陣，都想寫好少少架，但隻衰手又唔聽駛，寫寫下又變咗鬼畫符．

聖誕Blog Blog趣2009

今年既聖誕有點特別，我搞了一個blog聚，約了十一位小妹妹來參加．大家真俾面啊，沒有一位拒絕我，亦冇人甩底，連一早就嚷著是個病壞的小黑咪，也精神奕奕的出席，抱恙的只有我及花哩Look，我倆都鬧肚子不舒服呢！

今次我出的題目可害慘大家，大為各人都要為所有出席的美女（包括我）預備一份小禮物！到最後大家就會分別收到十二份禮物，滿載而歸．

咦？十二人，為各人預備禮物，不是只得十一份嗎？為什麼會有十二份的呢？其中一份是大家合作做的紀念品呢．

小琪兒最近迷上Decoupage，我的一份是相架呢．師奶的東東可多呢，有蜜柑味潤唇膏，月曆，連momo都有送我小印章呢！

小黑咪果真厲害，送我玉璽一個，另有Bibi十分欣賞既靚靚手作卡及食物封口器；最鍾意玩不織布既雀屎就做咗呢個聖誕老人吊飾；花哩Look當然做返自己的專長：羊毛毯手作，今回為大家做的是杯墊，另加泰國手信魷魚！大牛就買了布做禮物袋，裝著她為大家所做的聖誕卡，仲要大家分到卡後，即席請她寫回上款，過過大明星癮呢！我地既糕餅師pri就為大家做了雪球曲奇同聖誕曲奇，另加是日餐後甜品，栗子杯，真想無恥地要求多吃一杯呢！

小熊為大家預備了各款小本子，我分到的一本是金色的，加上靚靚雪花，相得益彰．最大工程既要自算是Mabel，Candyjai同Eunice做既手作啦．

Mabel做了多個手勾公仔，給師奶的一家三口箭豬尤其搞笑，而送給pri的一對結婚公仔更令她笑逐顏開，佢為我做既，係呢對家居便鞋，大冷天穿著在屋裏走就夠溫暖啦．

Candyjai做既，講出黎真係嚇鬼死！佢做咗十一個手縫既公仔呀！真係賣葛呀，咁大工程，唔知佢花咗幾多時間呀！

Eunice做既都係刺繡掛畫，但大家細心ｄ睇下：係一針一針咁繡上去架，加上佢有腰背痛兼手痛，要做咁多件，真係攞佢命呀！難得佢可以完成到．真係要為佢鼓掌呀！

今次大會既紀念品就係呢個小瓶子啦，一個全白小膠樽，我為大家預備咗一長條分開１２格的label紙，請大家即席揮毫，將自己既嘜頭加上去，完成後，就成為是日既紀念品啦！

為咗令大家明白張貼紙應該點整，我都係咁意做咗個實驗品俾佢地睇下架．

一睇就知係Mimi, 我，pri同Eunice既嘜頭啦

樽頂仲有今次聚會既名架，見唔見雀屎，呀Look，Mabel同小琪兒既真跡呀？

見唔見Candyjai個嘜頭呢？佢真係有好認真咁去設計過架，仲帶埋ｄ設計圖黎俾我睇呀．

呢個係pri既完成品，靚唔靚呢？

至於我送咗咩俾大家？

梗係離唔開我既老本行啦．．．

咪係全場最細，又最重既一磅庄．．．．

迷你粘土蛋糕咯！

希望大家收到滿心歡喜啦！

工展會2009

星期六，下班後約了阿草到Loving Hut吃午餐．我點了魚香茄子，忘了自己昨晚捱夜，腸胃較差，早上又不撿點地喝了咖啡，現在竟點了這個辣東西．吃完後，五內翻騰，差點去不成一下站：工展會．都是自己差勁，一見到茄子就飛身要吃．

阿草點了這素片炒河，不油膩的

到洗手間吐過後，向阿草坦白說出來，差點嚇到她呢，不好意思，肚子還有點痛呢，唯有帶她到住在附近的堂兄家竭一會．尤幸吃過藥及稍事休息後，又可以繼續上路，到工展會逛逛．一路也不敢試吃，擔心再有異端，就去不成晚上的blog聚了．

工展會現場，竟有這麼出色的中樂演奏，不枉此行呢！

尤其見著中間這位奏古箏旳小妹妹，一面聽，彷彿感受到她曾下過的苦功，眼眶也感動得有點濕了．

因為晚上還要聚會，實在不便買太多東西．初時也很克制，只挑輕的來買．這些冷凍式抽乾的士多啤梨及桃片，十分可口呢！$50六包

有機大蘑菰（像牛扒款大的呢），實在難以抗拒，但不是立即回家，唯有望菰輕歎．有機茶樹菰，非買不可（$45三小包），爸爸指明要買的有機葵花籽（因為老師說葵花總向著太陽生長，充滿正能量，對身體有益呢）$20三包，有機紅棗，超大粒，差不多寸半長一顆呢！連阿草都忍不住要出手了，氹呀媽開心係佢既天職麻，我亦買了一包給爸爸補充營養（$38）．有機巖鹽，$12一小包．

Lotte的朱古力百力滋，$35一大盒有十小盒，跟阿草孖份．藍莓芝士餅$10五盒，我分到三盒，但回家途中分了給小熊及Candyjai，得返一盒．馬仔$2，花生$20．有紫菜的那條是贈品．

有機皮蛋($20)，唔係度度有(有時專程去點點綠都買唔到)，唔買點得？淡口蝦醬($20)，上年買不到柚子，今年見到，雖然沒上年品質那麼好，但亦夠甜，唔買點得？（$10）阿草話一陣一定爆料，話我好買ｄ咁重野俾其他網友聽，等佢地笑我！

我地兩個，一路行，一路話：越黎越對得住自己呀！

2009 Christmas Gift - Vikki, Katrina, Klaas & 美奈

又一位網友送我禮物咯！乜咁大粒珠珠都穿到聖誕老人喎．

我喜歡，謝謝你啊！

這是另一位網友的作品，她送我美美的菊花印章呢！還有古老當時興的髮飾．可不是嗎？卅年前我也做了很多呢！

怎麼叫我師姐呢，那敢當呀！

爸爸又再私藏我既郵件，次次收咗信都唔記得繳械，今次係荷蘭一位男醫護人員朋友寄我的，因為佢既英文係超有限公司，所以多數以相代筆，看看上面的風景，猜到是在那兒拍的嗎？

原來是我們偉大的祖國啊！Everything has its beauty but not everyone sees it.　係呀，我就未見過啦！

晏少少，又收到日本寄來的賀卡，信封面貼滿開心貼紙．

仿教堂式玻璃窗既設計呢，三皇來朝呀？

這位好朋友自從Bibi出世後，每年都寄她聖誕禮物，仲好記得當年我地收到森林家族果種開心法呀！佢果陣仲一次過寄咗好幾套黎俾我地呀，連我都有得玩呀！搞到我都迷咗森林家族幾年呀！但係自從我自己識做迷你野之後就唔再迷佢地lu.

乜今次佢咁乖，聽我話，唔再寄禮物黎？原來．．．．佢竟然以傳統既日本作風，送紅包俾Bibi呀！

真係令我更加唔好意思啦！

2009 Christmas Gift - from 老闆 & friends

我老闆係教會既mentor，我為佢地果組安排咗聖誕聚餐，事後竟然收到大家送我既禮物．馬省席蓆哥哥拎袋野黎我檯果陣，明明見到雞乸咁大隻字寫住我老闆個名既，所以我都冇為意，做埋ｄ野先啦．後尾再睇下張便條，咦！原來係俾我架！

裏面有埋呢張靚靚熊仔卡，同埋一大盒Godiva，開心呀！

十點幾，老闆出現，佢就黎飛啦，拎咗pack粟米返黎俾我，話驚食唔切喎，仲有呢盒COVA朱古力，我留起三粒，諗住我地一家三口一人一粒，分一粒俾老闆，跟住派晒俾同事．放工遇到兩個朋友，一人分一粒，終於剩返一粒．

返到去，俾咗Bibi食，佢話咁啱今日先諗起呢隻朱古力，好耐冇食過喎，點知夜晚就有得食啦！

經過上次老闆懶醒，送我Spa同facial套餐俾我打回頭之後，佢都唔敢再亂出主意送禮物俾我啦．我果次揀咗要好幾套金庸新修版既小說，叫埋ｄ姊妹一齊去書店掃貨，托到死死下，但好開心．

今次佢又問我想要乜？原本想要套藏獒架，但爸爸又買咗啦．咁要咩好呢？一時間又諗唔到喎，冇咩想要．咁一係送我Three Sixty Gift Card啦，即係好似禮券咁，佢可以入面額入去既購物卡．但係佢居然叫我自己去買喎，係樓下你都唔自己去，車！都唔好玩既．

後尾我俾本支票簿佢：一係你開張支票俾我，我想買乜就買乜啦！

佢真係開咗張支票俾我喎！咁我點用好呢？可以買到好多玩具同材料架啦！

藏獒 - 點解冇第一集架?

一路想睇呢套藏獒好耐架啦，又費事去圖書館同人輪喎．原本諗住叫老闆買繁體字版送俾我做聖誕禮物既，但爸爸話佢去深圳書城喎，咪即管叫佢睇下買唔買到咯．

我：套書好似有兩三集架喎．

爸爸：咁你要兩集定三集呀？

我：總之就買晒成套啦．

終於？係呀，有三集架，簡體字版，仲好平添，廿六個大洋一本．

點知個傻佬淨買咗第二第三集返黎．

我：你做咩唔買第一集呀？

爸爸：我唔見有吖麻！

我：咁你唔會問下人既咩．．．

冇第一集係手，打死都唔睇住架啦，既然買咗，一定會買埋第一集既．況且，佢仲走去買咗個版面ｄ字咁細既，我依家老花，真係唔方便睇呀．

真係要搵日正正經經配返副大眼仔至得啦，第日手袋又多樣法寶啦！

P.S. 好多謝屯門既街坊，幫我買埋第一集，等我睇埋本Miracles in Andes，就開工睇佢啦．

2009 Christmas Gift - from 桃子 & 哎吔Bro

又收到禮物啦！朱古力薑餅人空降Office！

佢都有咳吐不喎，用呢ｄ紙黎做薑餅人既佈景板，真係靚啦．

見唔見到呢個雪人呀？佢個樣傻下傻下咁，啱晒我口胃呀！

我以前個導師話，自己做出黎既公仔，會有自己既影子架，唔通．．．．．

呢個係送俾Bibi既禮物，話說會夜光架，等我地留返過年先擺出黎啦．

一封未停，一封又黎，呢張係哎吔Bro設計既卡，好大張，好彩係寄去公司既唧，如果寄屋企，實聽縐晒都得啦．

佢今次醒我一條匙，唔知可以用黎開咩既呢？

可能係聖誕老人屋企既都未定．．．等我好好地發下夢先！

我知你地兩個都好忙，咁早就送我禮物，好多謝你地啊！

P.S. 師奶話要睇全相，咁好啦，就做一次黃大仙啦！

信封正面：

信封背面：

卡正面同背脊攤開晒啦！

裏面寫晒野，只可以俾咁多你睇啦：

清假咯

又到年尾，又係要清假既時候啦，我地係唔俾儲假期既．屋企有細路既家長，事必唔會隨便用晒ｄ假期既，有時真係話唔埋架麻．咁多年黎，Bibi都俾唔少驚風散我食架啦！加埋請咗九年賓賓既履歷，仲唔知咩叫做ｄ假期慳得一日得一日咩．．．．

就係咁，我仲有好幾日假未放．唉，年尾，鬼咁多野做，放假都唔知為乜，放完返黎仲死．所以，唯有係咁意卡啦卡啦咁放下啦．有斜棟，代表放半晝，大家果日就醒ｄ，咪打去我公司啦！仲有假期後第二天早上，生人勿近，一定一頭煙．

好彩仲可以通融下，係一月放埋佢．做乜唔放晒ｄ星期六？因為果日老板例假，星期五事必最忙，我星期六係用黎清ｄ平日冇時間清既野既，係咁意放少少好啦．放星期三就最好架啦，最唔影響工作．

酒箱內的神秘禮物

例牌聖誕要為老闆趕包禮物、趕出卡、趕送酒。

今年出術，用酒袋，咩包庄都慳返，乾手淨腳。

拆開一箱剛送來的白酒，發現了這瓶橄欖油！

當然啦，男人又點會同師奶爭吖，梗係我要啦麻！

余仁生

一個人逛街，經過余仁生，不如入去買ｄ杞子啦．

大大粒，四兩庄都只係$32．巡鋪一圈，怎麼沒有川貝的呢？

原來高高在上，放在貴價藥材架上．

兩種價錢，一百或百二蚊一兩，好貴啊！我雖然唔係好叻，但我認得食開果隻係咩樣既，所以我買咗百二蚊兩果ｄ．

呢度二兩架啦，返到屋企同爸爸講，呢度＄２４０，慳慳地都分到十次八次掛．

我地通常川貝，百合，雪梨，南北杏，果皮加蜜棗（或冰糖）黎煲既．不過，如果你感冒初起，就唔好飲呢個湯水啦．

據網友心星講：川貝和雪梨確有止咳化痰的作用，但不是什麼類型的咳嗽都能止的，不但不能，用得不好，還會加重病情。

川貝，雪梨性寒，川貝主要有宣肺、止咳、化痰作用，乾咳，痰少而黃，咽喉有痛癢感為佳。雪梨則有潤喉，利肺的作用。兩種和用，則有止咳化痰，清咽利肺的療效。但是如果在咳嗽的同時，有鼻塞，流涕等感冒症狀，不但不能達到止咳的效果，對於風寒引起的咳嗽不利，所以可能還會加重了。