剝智慧齒一

今日放咗工，即刻去美心買三文治返屋企，點知又遇到負責開三文治既阿姐行開咗，三文治巴檯果邊冇人當值添，唯有俾個夾西餅既姐姐仔整啦。

 

可能佢從來冇整過，唔知標準係點，就咁以為好似自己係屋企做三文治食咁，係咁意好似塗牛油咁，放咗好少沙律蛋係我份三文治度。所以，我從未食過咁扁既西式三文治。有冇搞錯呀！我差唔多隔一個星期六就會買一次，而且間中返工食晏果陣都有買既，我絕對清楚美心既午餐三文治係點既，一向ｄ餡起碼都有成寸厚架！但我俾完錢行去等果陣，見到咁既情況，佢已經整緊第二份啦，又要趕去搭村巴，唯有食少啖當減肥啦！

 

約咗牙醫五點，我家陳小姐要剝智慧牙。好緊張，驚有咩ｅ郁。成二千二百蚊剝一只，好貴呀！仲要分兩次去，剝兩只添，荷包就認真大出血啦！

 

牙醫叔叔仲話：如果唔夠位生，就要趁年輕快手剝，咁ｄ牙腳就冇生得咁長，冇咁容易壓到神經線，易剝ｄ，而且可以減低蛀牙風險。

 

當然啦，佢梗係會循例解釋埋做呢項手術既風險啦，又話要將只牙分開三份，又話有幾多％會搞到下巴肌肉遲鈍，仲話會痛幾日同埋變豬頭喎，嚇到陳小姐真係有ｄ緊張。

 

之後，我就要出返外面等啦。個牙醫仲話：如果手術順利，應該半個鐘就搞掂，但如果情況差ｄ，就唔止啦。

 

於是我就去外面行個圈，又走咗去百佳掃貨。爸爸唔想拎野，一路猛話：有咩好買唧？但入到去之後，除咗我話要買果三包仔薯片之外，檸檬夾心餅、三盒海苔梳打餅都算輕kang，但兩枝一公升庄初榨純橄欖油同一枝甜醋就係佢自己想買既。點知都未俾錢，牙醫護士已經電召我回歸啦。

 

陳小姐外表睇黎都冇乜野喎，只智慧齒牙冠就散開咗幾粒，牙腳就分開兩邊拉咗出黎。算順利啦，連埋照X-光都係廿五分鐘唧。我問：咁幾時先會腫呀？答案係聽日。咁就祝佢好運啦！

 

之後，走去麥記買咗份日本芥末魚柳包餐，（呃鬼！都唔係咁好味既！）去完七仔買雪糕，又去麵包店買一陣風式既紙包蛋糕俾陳小姐做晚餐。