紅豆糕

今日放工返屋企，有特別任務。

事關明天是學校家教會就職典禮，某成員情商我客串，整甜品。

咁好啦，想食咩吖你地？佢話食過我ｄ紅豆糕，覺得好食喎，就紅豆糕啦！

咁想整幾多呀？嗄！兩個A4紙大少少既錫紙盆？咁咪即係四底！淨買材料都托死我啦。

話時話吖，我整野一向放足材料既，我又用開黑糖，如果今次用家教會既錢去整，淨買糖都要幾十蚊啦，唔化算喎。咁就用普通粗砂糖算啦，加埋椰汁、紅豆、粟粉、花奶，再買兩個錫紙兜，都要百幾蚊。佢地話冇問題喎，仲話如果叫外賣到會仲貴呀。

是但啦，我都未試過煮咁大既份量。亦冇咁大個煲，所以唯有分開兩次煮啦。

用個大真空煲黎煮，都爭ｄ滿瀉，咁先做到一個錫紙兜咋！

當ｄ粉漿好杰果陣，係會好重既，又要不停去搞，又驚粘底，又驚滿瀉，又驚果ｄ好似溶岩咁既高溫粉漿彈上黎淥瓜我。雖然我教人整呢ｄ糕點都教過好多次，都算係熟手女工唧，但少沾手吖麻，自從屋企冇賓賓之後，我都未搞過咁大工程啦。

搞到手軟，整好一盆，真係要抖抖。又要清理現場，洗過晒ｄ煲先再煮過，下次都係咪啦，做一兜算啦！

睇下！係咪都算大盆呢！