士多啤梨

成日都係做迷你野，連一d基本整花既技巧都唔曉，又好似唔係幾對路咁，於是舊年暑假我就乖乖地去學正式既初級班啦。

頭果兩樣學既係士多啤梨同提子，我諗大部分既同好都做過士多啤梨架啦，相信大家都知道點做架啦。

返第一堂，我就覺得有需要搵人心理輔導下我啦！

點解？因為做開迷你野，係好慳家既，平日我用少少粘土，就可以玩好耐，依家要我咁豪，一抽提子用晒成條粘土喎，仲要用夠三條粘土先做到一碟出黎！一粒提子都夠我做一盆壽司啦！唉～好大晒呀！點解唔可以做細d唧 , 咁鬼大, 睇唔慣呀!

既然報咗名啦，咁我總算都肯乖乖地聽教既，呢ｄ就係我初級班既第一盆作品啦 , 計我話呢，士多啤梨既果子係應該係有大有細既，而且成熟程度都應該唔同，所以我上色果陣都好認真架，第一次做 , 係咁上下啦。

d粒粒係我逐針吉上去既，要整整齊齊先得，事關實物都係好整齊既 . 做到呢度，都唔算太難，淨係為呢d士多啤梨著返條裙仔，已經做瓜我啦！

大家都知啦，跟住少不免又要做大量既葉，仲要做埋花蕾同花仔添！

為咗要自然，ｄ士多啤梨我粒粒都係用粘土包住條莖既，再用tape帶組合起來，手指都起卜咯！

人地都未試過咁催殘對手架！又唔可以戴手套喎！要好好療傷先得啦！

大家睇下室內影既相：

放係膠椅上影，麻麻．

放係檯上影，好少少．

拍外景就好得多啦 , 話晒都有天然光吖麻！不過 , 一條友走去平台度自拍 , 有d異相!

咁好啦，見你都唔係太差，我就俾你留低啦！