呢輪都懶去圖書館，連爸爸買果套書劍恩仇錄舊版都睇埋，Bibi果套低ｂ版世界文學名著又俾我KO咗，今回真係要連ｄ私人珍藏英文書都拎埋出黎啦．
終於，呢套哈利波特都出土啦！
當年，我係托人係書展買最初果幾集既，後尾佢每出新既一集，我都照買，諗住總有一日，Bibi會啱睇吖麻．（唉～～，都唔知幾時金庸同哈仔，先召喚到佢黎幫襯呢？）
睇書要講緣份既，只要放係隨手就拎到既位置，難保有一日佢會肯睇架．就好似我小學二年級時，無無聊聊係書架度拎ｄ讀者文摘黎睇一樣之麻．
我原本冇打算自己睇架，我只係睇咗中文版唧．諗住故事入面咁多鬼五馬六既名，實好多我唔識既字詞啦，鬼識睇咩！
原來，我睇第一集既英文版比當年睇中文版流暢得多．或者我一早就打咗底，知道晒ｄ劇情掛．而且最初我係睇簡體字既，又辛苦咗ｄｄ，所以依家睇英文版反而覺得唔錯喎．
有段小插曲要提一提：有日我去shopping，俾錢之後，就係袋度拎咗第四集出黎，諗住放咗袋衫入去，先拎返本書．
點知售貨員好奇地問：咦，呢本野咁厚既，聖經黎架？
睇睇下，咦！唔見咗本第五集既鳳凰會密令既？梗係唔識英文既爸爸唔知同我塞咗去邊啦．．．咁咪斷纜咯！
* * * *
老實講吖，英文一向係我最差既一科黎，或者咁多年黎，睇咗咁多兒童圖書，對我既英文水平，真係有好大幫助都未定．我讀中學果陣，真係冇諗過自己可以睇到英文報紙同睇埋呢ｄ咁厚既英文書架．
原來，只要對得多，就自然會明架啦！縱使係發音，多睇幾次，都會推敲到．我冇學過正式併音架，我一向係用另一套方式去學英文既．我都係用呢套特別既理解方法（我叫呢ｄ做對英文既感覺）去教Bibi既，係學習英文上，佢一路都冇乜問題，亦都好慶幸我係佢細個果陣，用咁既方式引導佢學習，記生字都好似玩唱遊咁，冇壓力．但係，如果你要我整理一套理論出黎話你知呢，我就真係無能為力啦．事關呢ｄ方法，我只懂得融入日常同小朋既交流入面，用講故事同遊戲去表達，所以係要花好多時間既，呢ｄ親子生活，係好值得投資架．
沒有留言:
張貼留言