蒜頭？洋蔥？

某日，識飲識食的嬸嬸午飯後買了一袋白色的粒粒回來．

我一看：洋蔥仔呀？

嬸嬸：唔係呀，蒜頭黎架！

我：嗄～獨子蒜？唔係咁樣架喎．

嬸嬸：鬼佬蒜頭吖麻．．．

我：咁同我地食開果ｄ有咩分別呀？

嬸嬸：Juicyｄ咯．

我：係？咁就要見識下啦，你俾一粒我返去玩下啦，等我用黎蒸下豉汁排骨先．

嬸嬸：一粒點夠架，整夠四粒啦．

臨放工，嬸嬸打內線俾我．

嬸嬸：大鑊啦！

我：咩事呀？

嬸嬸：原來果ｄ真係唔係蒜頭黎架！你千其咪用黎蒸排骨喎，係洋蔥仔黎架原來．

我：唔緊要，我可以用黎煮其他餸架麻．

最後呢，我就用咗兩粒黎煮白汁蘆筍肉粒，另外果兩粒就煮咗咖哩薯仔青衣柳粒，兩款都好味．

佢既威力有幾大呢？唔知係咪我既嗅覺寧舍厲害，定係我少處理ｄ蔥蒜韭之類既配料，洗咗咁多次手，沖咗好幾次涼，過兩日都仲感覺到指頭有少少洋蔥仔味呀！