雕了好幾個揮春印仔，當然要好好利用啦．
就咁印出黎已經唔錯架啦．
但原來用凸字粉既效果仲正．
因為懶得去除低隱形眼鏡就玩，所以根本唔係睇得咁清楚架咋．
為咗令你地睇唔到咁多瑕疵，不如遠鏡ｄ啦．
就咁睇，唔覺既．
係威係勢架．
係咪就咁就算呢？好似簡陋咗ｄ咁．但呢廿張仔，做咗成晚架啦．
試下加上金光閃耀既磁石貼
仲唔夠晒醒神？
磁石貼都唔係人人合用，咁有冇再快靚正既方法去整呢？
終於，我將佢地變成一批貼紙．
紅色環保紙唔多，基於僧多粥少，不如橙色紙都用埋啦！
實物睇呢，橙色好似仲sharp D，加埋呢ｄ就應該夠用啦．
我話快靚正呢，咪以為真係好易做．
唔好計要雕個印啦，就當你買咗個現成印返黎，首先要將環保紙切割合適大小，唔好以為就咁就用得喎．
跟手要蓋印，你估下下都咁子手勢，印到四四正正咩？
印完仲要上粉，然後用熱風槍吹起佢．呢個工序都好多時出錯架，而且頂多一次過吹兩張仔．
之後，再裁正張揮春，又要剪托底紙．
將揮春用雙面膠紙粘到底紙上，再係背後貼上厚厚既發泡膠雙面貼紙，方便大家四圍貼．
整呢度咁多張揮春仔，前前後後都做咗超過五個鐘架．
之後，加碼做多少少，又用咗一晚．
相信各位姨媽姑姐都已經收到啦，請你地唔好嫌棄，小小意思，不成敬意．
