呢牌星期六我都唔駛返，所以就同爸爸去花墟公園行下漁農展啦．
先去瑞士咖啡室食個早餐，我既鮮茄火腿通．
雖然味道一般，但確實有好多茄蓉．
個餐係跟煎雙蛋同油包既，原來油包係多士黎．
爸爸既雪菜肉絲米
杯奶茶就算滑啦．一個早餐廿三個大洋．
估唔到今年咁多有機作物既攤檔喎！以前都只係一半一半架咋．
菜心有花，有咩特別呢？睇真ｄ！
城市難見既蜜蜂呀！
即食紫菜，十蚊包，兩包仲送魷魚絲，我有買．紫菜本身冇乜調味既，爸爸拎咗ｄ黎淥公仔麵，真係唔錯喎～
見唔見呀？我其中一樣童年回憶：老鼠斑咸魚呀！Bibi，我冇呃你地架，真係有架．所以今次我都有買返舊黎試下，唔知味道點呢？咁一定唔及我當年姨公自己生曬黎送俾公公果條啦，佢真係出海打返黎架喎．
呢ｄ展品蔬菜係真野黎架，但就十足十假野一樣．
睇下ｄ彩椒同南瓜，真係靚到極．
各式生菜
仲有薰衣草添
我覺得自己好鬼叻呀，竟然係咁多遊人既情況下影ｄ相出黎，好似冇乜人行咁．
話明漁農展咯，又點少得鮮魚吖？
仲有現場節目欣賞架，我就坐低睇咗小朋友跳一隻舞啦．做咩唔影，我飲緊湯冇手麻，杯湯好ｃ熱架．
順便買咗杯龍躉南瓜湯，正呀！廿蚊杯，值！唔係咁少既，我飲飲下先影咋，佢係只俾淨湯你既，冇用其他材料充數架．
轉個頭賣晒，影ｄ湯渣你地睇下．咪以為好細呀，呢個盆幾尺直徑架，咁你可以想像到條魚有幾大啦．
食咗有機超甜粟，十蚊枝．食完一枝番尋味，行返去又買多枝先走．
松記出名芒果腸粉，但我冇試．買咗十蚊兩碗既豆腐花．
白花菰都唔錯，買咗盒，九十蚊．
本地有機菊，廿蚊．
驅蚊草($20)，薰衣草($15)，呢款薰衣草係用黎鍊油果隻黎，同上面果ｄ有好多花既唔同架．
有機薑，呢度廿四蚊．有機薑一向都好un豬既，但薑味會濃ｄ．
我仲買埋即食海蜇，Bibi鍾意麻．五十蚊三包既有機蘑菰，一套午餐肉同兩包豆皮結．加埋用咗四百幾蚊．
沒有留言:
張貼留言