大白菜湯

落晒野先醒起：咦，呢款湯都可以俾Bibi參考下．

咁好啦，冇相你就自己想像下啦．

材料：蜜棗２－３粒(點解唔講實? 蜜棗都有大有細架麻!)

南北杏，落幾多？你咪好鍾意食既，用中式湯匙量2-3匙，係咁意沖洗下佢啦．

果皮一角，先浸軟，刮去內層既囊先用，咁就唔濕熱啦．

西施骨（豬展或者豬踭都得架），同埋主角大白菜．d菜要真係好肥大肉厚先好喎（一棵都大過你隻手架）．洗菜唔駛教你啦掛？

肉買幾多？我點知市價幾多喎？

一般西施骨就一扇既，街市通常破開兩邊咁賣，買一邊就夠啦．

如果買豬展呢，前展（即前足）會細條ｄ，買兩舊啦；如果後展（即後足）就會大舊ｄ，一舊都得啦．

至於豬踭呢，雖然煲出黎既湯會多ｄ油（你可以pit油架麻），但係ｄ湯煲好果陣，你撈起舊肉，切開佢，就咁點豉油食，都好好味架．

咁大白菜又買幾多？老實講，棵棵菜都唔同，你話同人買一斤喎，人地都好難秤俾你．所以我多數話要４棵大既（如果你見ｄ菜太un豬，好心你就咪煲呢樣啦），等佢照秤好啦．反正煲完湯出黎，ｄ菜係好好食既，實清晒架．

如果你要出術，放少少金華火腿片或者加幾粒瑤柱去煲都得架，好味好多既．

ｄ人成日話：白菜寒喎！嗄，煮咗老火湯都唔寒啦，驚就加兩片薑咯．

步驟：

凍水放果皮，蜜棗，南北杏．

滾起就加肉，金華火腿／乾瑤柱．

再滾起就加薑片同菜，呢個時候，你可能會發現．．．咦！乜水位突然升得咁高既，咪滾瀉咯！

冇有怕，你阿媽我既格言：野就死既，人就生既！

水太多咪用隻大湯碗盛起一ｄ咯，到水位低返ｄ，再加返入去都得既．我就梗係冇你咁史提拔啦，預既水位啱啱好，你睇！

煲幾耐？老火湯用明火煮，起碼個半至兩個鐘架．如果用真空煲呢，所有材料落晒後，滾起計１５分鐘，放回真空煲兩粒鐘，再拎去滾多半個鐘，就夠出味架啦．

飲果陣自己放鹽調味啦，唔係咁都要我教你吖麻？

道理其實好簡單，改用西洋菜都得架．唔用蜜棗既話，放半個羅漢果亦好潤架．