上次食飯，show me話有個朱古力團購班，問大家有冇興趣，於是我就去試下啦．
南豐中心，我識路喎！真係冇乜幾可架．
未開始上堂，偷影下ｄ材料先．
呢ｄ係做Melty Kiss(朱古力松露)既材料：
Dark Choco 100g
Fresh Cream 60g
Baileys 10g (1 table spoon)
Butter 10g
Choco powder
忌廉已經分好一份份，牛油已攤軟，Bailey酒，朱古力（係焗爐度坐溶）
1. 先要將朱古力放入深碗，以５０度係焗爐度焗溶，或者係微波爐逐分鐘叮溶佢，每次都拎出黎搞下，等溫度勻循．
2. 牛油呢，就要變到軟身，唔係溶晒喎．
3. 拎碗溶咗既朱古出黎，先用匙搞勻，放入牛油，拌勻，以朱古力既熱度，令牛油融入裏面．（攪幾攪好啦）再加一湯匙Bailey酒．
4. 把已加熱之忌廉慢慢由碗邊倒入裝著朱古力的碗內，隨即以畫小圈之手勢攪拌，慢慢由小圈變大圈，將底部既朱古力漿翻出，直到混合物攪至滑身及融和．
5. 平均倒入已鋪備牛油紙的溶器內，雪凍．
仲以為唔俾影相既，原來可以架，等我地之前仲唔敢拎相機出黎，搞到大部分過程都冇相睇添．
6. 朱古力凝固後，取出並撕走牛油紙，飛邊，再切成適中大小，再灑上谷古粉（要用防潮的谷古粉啊！）
呢個禮盒真係幾靚，仲可以當埋模具黎用添．
加返張牛油紙，蓋好就係一份精美既禮物啦．不過，ｄ咁好味既野，我一粒都冇食到，梗係要留返ｄVIP食架啦．
其實我都知咩味既，事關我食咗導師示範果Ｄ，真係拍得住Royce呀！
我俾Bibi食咗一粒，佢話呢ｄ應該叫Maylikiss喎．
冧酒榛子朱古力既材料：通心朱古力殼，Rum酒，果仁碎，榛子朱古力
呢ｄ果仁預早焗過才壓碎
心心朱古力殼
Rum酒
份量：
朱古力殼 ８粒
榛子朱古力 ４８克
杏仁碎 １２克
冧酒 １茶匙
裝飾性白朱古力及牛奶朱古力漿少許
製法：
將已預先整溶咗既榛子朱古力漿翻攪一下，加果仁碎，攪勻後加一匙Rum酒．混合妥當就放入滋袋．
記住呀：要反起滋袋先放朱古力，咁會企理ｄ，係袋入面將空氣滋出，才在末端剪一小口．
將餡料滋入朱古力殼內，最好呢，就係伸滋袋入去果陣，一路滋，一路順住方向等每個角落都滿晒．最後去到頂啦，就要抹走多餘既餡，要開口位窩入去．
滋完有剩喎，梗係入晒我既長頸樽啦．食得唔好晒麻．
再用朱古力漿封口，等佢自動凝固．
反身就睇唔到啦，依家咪幾靚咯．
點知，原來仲要整少少朱古力紋上去裝飾架．
我ｄ技術，真係慘不忍睹呀．．．
呢ｄ係show me整既：
如月整既：佢話攞呢邊鏡，唔好影到ｄ飛到四圍都係既朱古力漿喎．佢影慣食物，係唔同ｄ既．
另一位同學整既：
整完就一人俾兩個紙兜我地入起佢
再包庄成為一份小禮物
一盒送咗俾個街坊，一盒俾Bibi帶返學校食．
咬開入面係咁既，因為我已經嘗過餡係咩味，所以都冇乜興趣再食，都係留返俾人食啦．
最後係朱古力示範，用新鮮士多啤梨沾朱古力漿做裝飾．
修剪冇咁靚仔既葉
先上白朱古力漿
接住係左右兩面沾黑朱古力
用小滋袋滋兩點朱古力做鈕扣，就大功告成啦．
我不嬲都唔正經架啦，叫大家反轉黎影，咁就變成鬼太郎啦！
係啦．．．做乜一定要做紳士唧？
鬼太郎咁款，仲殺食啦！
咁頭先做Maylikiss飛邊出黎既朱古力都食得架麻，打包返屋企先．
放咗學買包純黑谷古粉．
將ｄ剩餘物資，按成一粒粒朱古力小球，再碌下ｄ純黑谷古粉．等我試下味先，唔～，唔算太苦唧．
我專登買咁黑既，整出黎苦ｄ好味ｄ．就叫佢做黑金剛啦．
真係唔錯喎！賣相係差咗少少，但味道一樣咁好架．
呢兜野我準備拎返公司食，Bibi見我只係留返兩粒俾佢，問：點解得咁少既？
沒有留言:
張貼留言