我地選咗龍門居呢間小小咖啡店，全店得八個位架咋。
估佢唔到卅幾蚊就有個餐，全場最貴都只係牛扒同羊架。
餐湯份量好少，係好hea既粟米豆腐羮，我諗水深得一寸咁上下，配個暖暖既牛角包仔，俾我地食咗幾啖先記得影相。
碟意粉真係令人喜出望外，夠彈牙，亦係新鮮熱辣煮出黎既，你地眼見都起碼有七隻蝦啦，比起Bean´s Cafe真係強多啦!
我地叫咗一杯奶茶同一杯咖啡。我其實唔餓，所以叫咗件奶醬多$10，加$5要咗咖啡。
加$10可以要件細蛋糕，$20要件大蛋糕，有芒果芝士、藍莓芝士、黑森林等。蛋糕仲有分餅底同蛋糕底，我地加咗$20，兩款都試下。我係先叫咗一件，一人食咗一啖先決定要埋第二件既，咁即係味道唔算差。
睇下，咁食法都只係$68。
我見到有個十一、二歲既男仔，自己一個黎食，叫咗杯凍檸茶、金菇肥牛卷沙律、湯、包、一碟意粉、一件黑森林，成為$75。俾我食就一定飽到傻。
早知我就叫飛碟啦，呢樣食物都算係我既童年回憶黎，我小學果陣覺得廣告話可以用隔夜餸黎整呢d飛碟，係好奇妙既一件事黎。
我見到D家長帶小朋友黎食都興叫輕怡餐俾佢地，賣相都唔錯架。
呢度仲有一個優點，雖然座位少，但佢地歡迎外賣。各位街坊會預先打電話落單，轉頭先黎拎。咁我亦可以照版煮碗，放工架車去到咁上下就打電話去落柯打，咁去到就唔駛等就可以拎到外賣走啦。
