小南洋

係將軍澳拜完山，去大本型氹返轉，跟住爸爸又話要食D野。我地係大食代行咗個圈，終於揀咗呢間店坐低，貪佢自成一國，有人幫我地拎食物上檯，只要買咗飛就得啦。

我事先有揭下個餐牌先入去既，

諗住食碗南洋叻沙，我唔知正宗既應該係點既，雖然湯頭係熱既，但我覺得豆卜冇正式放入湯度煮到熱透，就真係唔掂。D雞亦都係就咁放上面既，凍既!

好彩杯南洋茶走同啡走都似樣，爸爸一見兩杯野上檯就問我點解唔叫鴛鴦喎，乜你咁煩架!咁我就飲咗半杯咖啡，俾佢倒半杯奶茶入去變成鴛鴦，跟住我再飲埋果半杯奶茶。

呢份就係呢度既餐牌

如果唔係睇呢個說明，我仲以為南洋只係指星馬地區添。

因為唔多餓，所以冇考慮食飯餐啦。

呢三款餐仲有菜或魚肉豆卜、湯或餐飲。

下午茶黎個土司都唔錯喎。

仲可以單點小食加餸，都幾好喎。

咖啡、奶茶都可以選煉奶同花奶，彈性處理香港人既口味。

另有數款特飲，間中轉下口味，可以感受下東南亞風情。