香蕉糕

收到一個香蕉糕食譜，需要材料: 

香蕉3隻、糯米粉250g、粘米粉70g、滾水100ml、糖70g、糕粉(即炒熟既糯米粉)少許。

呢個食譜冇用到香蕉香油，比較合我意。人家食譜講到明，佢既製品係比較煙靭，若然喜歡腍D，就要減少糯米粉既份量，加大粘米粉既份量。

先買一梳七隻蕉返屋企做實驗，千叮萬囑叫大小不良食還食，唔好食剩少過三隻。

第一底，未蒸之前都覺得杰撻撻，係咪咁架?

蒸好之後，撩一忽出黎試下，又唔算太差喎。

因為上次玩冰皮月餅時，浪費咗太多糯米粉做糕粉，所以今次唔好用糕粉啦，留返D糯米粉再整多次，所以我就將D香蕉糕切開之後用保鮮紙獨立包起就算。

我知道香蕉糕唔應該雪住既，但爸爸話天氣熱，堅持要放入雪櫃。咁我就放一件入雪櫃試下，少少硬，都可以既。

再買多梳十隻返黎，我越係話唔俾食，大小不良就越係想食，最後我要出絕招，將最後四隻，用錫紙包住佢地個頭做記號。

我冇跟足人地既步驟，用返我認為最方便既方法去做。

既然人地話全部粉量係250g + 70g = 320g，我剩返233g糯米粉，於是就去盡d，咁就配87g粘米粉。香蕉放夠四隻，因為之前覺得太杰，於是水就用咗150ml(即係多咗成半)，糖就加多20g。

先將糯米粉同粘米粉篩入大碗

將糖在熱水內攪溶

用攪拌器將香蕉變成糊，加入糖水內。

再逐少攪入d粉內，我覺得咁做會比較冇咁易起粉粒。(是關我之前跟人地食譜既步驟，將粉攪入香蕉糊入面，但效果不太好，而且比較難處理，仲要過多次篩以防有粉粒。)

攪好咗粉漿之後，就要開始蒸糕啦，先要用油塗勻個糕盆。油唔可以太少，以免難脫模。

將粉漿倒入去蒸

蒸咗30分鐘，插過牙籤，冇粉漿粘住就ok啦。

攤凍之後，就可以成底糕倒出黎。

我就先墊保鮮紙，再係把刀上抹下油，咁樣切就好易切開一件件，人地既食譜話要係各面沾上糕粉，方便取食。我呢? 我就唔用糕粉啦，其實用保鮮紙一件件獨立包裝，食起黎都好方便吖。

後記: 雖然我已經放咗咁多水，始終都係太韌，或者可以再稀d，糯米粉同粘米粉既比重再要調整下。我本身又唔食呢d糕點既，真係冇心機再做實驗啦。有興趣試下既朋友，就祝你好運啦!