花展2010

今年花展，眾人媽打又有參加，雖然佢只係抱住觀摩既心去學下野，我都好樂意去捧下佢場．

呢盆就係佢參賽主題”英雄美人”既作品啦．好彩我地去到，佢仲係開得好靚唧．

佢想將王子同公主幸福快樂地生活既理念展示出黎，所以後面整咗個皇冠形既拱門．

唔記得影冠軍作品添，等我去偷一幅俾大家睇下：

我知點解我地ｄ相靚ｄ啦，因為我有爸爸渣機，可以由高角度影落去，唔駛隔住塊花晒既膠板．

另一款主題為”魔鏡”既迷你花藝插作參賽作品，我地就叻啦，影得仲靚過媽打自己果幅添！

呢個係冠軍作品，我個人就唔多識欣賞花藝既，所以覺得冇乜特別．

呢個係另一位參賽作品

全場至勁呢棵蘭花，又大又壯！

我地睇盆景既時候，見到有條甩咗尾既四腳蛇，呢ｄ係爸爸最有興趣既，佢又點會唔影至得架？

場內少不免有各組大形展景，係咁意俾幾幅大家睇下啦．

每次去花展，都見到中樂團既表演，學生們能多些機會作大形戶外演出，不失為一種實際既訓練形式．

我呢ｄ師奶，花就唔多識啦，驅蚊草係我必買既，貪佢夠肥夠壯，我老闆最鍾意佢既氣味，我試過種到un晒就掉咗佢，佢又lur我買過．咁好啦，種到下一個農藝展覽，又再買一棵替換啦．

跟住事必要去有機菜檔買餸啦麻，半島既有機茶樹菰梗係要整返兩包啦．只係$12包唧，雖然吉之島$9.9既份量都有呢度既兩倍，但佢地係志願機構，大家都應該支持下既．正如新生農舍出售既貨品未必平過其他有機地方，但我地都會專登同佢買，支持下ｄ精神病康復者．

有機紅蘿蔔，我專登揀呢兩隻既，見佢造型特別吖麻．ｄ人梗係話：做乜揀ｄ三尖八角架？批完都冇幾多食啦！如果係有機既，仔細ｄ洗擦乾淨，可以連皮食架，而且皮都好有營養既．

呢ｄ係橙黃色既車厘茄，現場有得試食架，但我嫌污糟，唔會隨便放野入口既．聽到現場ｄ師奶嬸嬸都話甜，應該都唔錯既，又買咗一磅．

阿姐見我冇同人爭，專登對我好ｄ，揀抽四正ｄ既俾我．其實大粒細粒都好味既，為咗俾大家睇清楚佢同普通蕃茄顏色上既對比，我又影幅俾你地睇下．

早上煮魚旦麵俾Bibi食，都放咗幾粒波子咁大既入去做配菜，煮好之後，成粒放入口（小心熱喎），咬開，ｄ汁幾咁鮮呀，果然係正野呀！入面係飽滿既果肉，ｄ核仲一ｄ都唔鞋口架．