賤兔，可算共我有緣．
當年某位老闆無啦啦叫我入房，問我可唔可以湊埋個新Trainee．我二話不說：只有賤力既唧！都冇諗過佢真係叫賤兔既．
還好，湊埋賤兔雖然會忙ｄ，佢真係夠晒生性，做事認真又做得野，真係辛苦ｄ都抵呀！兩年既實習生涯好快過，轉眼佢又卜頭殼可以正式掛牌做律師啦．果日我都有帶埋Bibi去觀禮架．
雖然賤兔後來轉咗公司，我地都好少見面，但佢竟然咁叻揀咗三月九號，我結婚出門果日黎結婚喎（其實當年我二月十三日就註咗冊啦，公公話要過咗正月先好出門喎，所以仲可以鏢埋個尾會先嫁人）．冇錯，就係今日啦！咁就順便祝佢週年愉快啦，我同爸爸老夫老妻，從來都冇慶祝過架，總之佢唔窒住晒咪算偷笑咯．
自從生咗Bibi之後，一般同事結婚請飲我都係唔出席既．但係小數我由細睇到大既，就會破例既．婚宴上，見佢老公咁錫佢，我地都好鄧佢開心！
今年既年初四，賤兔既囝囝就出咗世啦．所以我就送咗呢個蛋糕俾佢啦！
我邊得黎咁勤力，咁早開爐吖？我係佢大緊肚果陣已經整定架啦．鮮檸片，士多啤梨，芒果醬，加上得意小熊，希望Ethan快高長大，健康活潑啦！不過，千其咪高過佢爹地，唔係就太高架啦！
落重本，用咗好多士多啤梨．亦冇乜幾可做到個蛋糕咁大個．
唔係你估，五磅庄蛋糕黎麻！有返咁上下份量至得．
賤兔就梗知我做手工有返兩度啦，但佢呀媽唔知吖麻！最搞笑係佢見到個蛋糕就話：人地買架，你睇下吖，後面有公司名架！
其實呢，佢指既公司名，係我既電郵地址黎咋！
熟口熟面既賀卡，似曾相識哩，我懶麻，急就章，其餘既BB卡都拎晒俾人去義賣啦，冇晒存貨啦麻．
但係一加咗呢ｄ咁靚既字呢，當堂畫龍點睛，成張卡靚晒！
祝你有一個幸福美滿既家庭呀！
沒有留言:
張貼留言