2012好開始

2/1, 五點幾起身, 六點call咗部八折的車Bibi去機場, 六天既墾丁核電廠及沙漠考察之旅起行.

始終都有甩漏, 但都唔係咩大不了既野, 都唔緊要既. 跟住我地坐S1去咗東涌.

仲以為爸爸有幾識路, 兜一輪, 竟然係逃唔出大記集團既魔掌.

食完兜一輪,d店都未開, 又未夠九點, 爸爸話不如去昂平咯! 既然只得十零人排隊, 咁就排一陣隊啦.

D飛原來都幾化學下, 入閘後會食飛, 要搞一輪, 仲兩野就俾工作人員整爛咗添! 但佢話唔怕喎, 到時回程會有人係閘口俾過另一張飛我出閘喎. 睇怕咁既情況經常發生, 唔怪得知人多既時候會click實晒d人啦.

爸爸後腦既剷青長返d啦,冇咁肉酸lu.

係吊車上, 見有港龍升空, 可能係Bibi果班機都未定呀.



上到黎, 梗有係市集留連一陣既

叫爸爸係長梯級度同我影大佛既遠角度合照, 佢不情不願. 原來佢話我身邊有d女仔係著短裙既, 佢踎係度影, 瓜田李下, 唔方便喎.

跟住我地又行去心經簡林, 因為時間尚早, 只得我地兩個咁滯. 拿, 我終於都出鏡啦.



市集外仲有d檔仔賣紀念品既, 一百蚊三隻錶, 都算價錢公道, 為表支持, 係咁意買隻雞乸咁大隻字既錶啦.



回程時冇乜人, 我同爸爸包咗架吊車, 正咯.....

落到去先見到人龍排到好長, 鬼咩, 入閘系統咁差勁, 想散得切d人都難啦!

去返東涌坐車, 經過東薈城既噴泉, 俾爸爸回味下Bibi細個果陣係度玩到變落湯雞既情境.

約咗班姨媽姑爹中午茶聚, 匆匆趕返出銅鑼灣.



hehe.... 飲完茶仲去埋Sogo Basement, 買咗呢間野既出品:

我家姐話呢d好好味架, 仲好食過山x喎, 所以我都走去買黎試下.

係咁意買咗麻薯同原味牛角酥, 麻薯呢.... 未有機會見到部相機, 已經入晒我既長頸樽啦. 而牛角酥呢, 仲有朱古力味架, 但因為佢貴d, 所以我冇買. 咁點解會好食d呢? 我發現佢既大秘密係牛角酥表層有一層薄薄既糖面, 焗完就係脆脆地既, 就算放涼咗, 都仲可以保持脆度, 味道亦比較平衡, 唔多覺油(但牛角酥真係超高卡架), 好容易一口氣嗒幾件落肚架, 真係好易食肥人, 偶爾食下好啦.