龍年大吉大利(一)

我都覺得自己厲害架啦，夠膽死拖到一月九號先黎開工．唔知點解真係冇乜動力咯，可能早輪做口金做傻咗個人，又唔見有咩突破，對手作有少少冷感都未定．

唔理啦，剪咗鐵線就會做架啦．



第一晚，只做了幾十塊葉，唔鬼理啦，都費事加葉紋咯，反正大家都睇得唔清唔楚架啦．

１０／１，早上又剪定同屈定Ｄ做桔仔既鐵線，返到公司急召隔離位同事幫拖，利用食晏半粒鐘，都起到幾十塊葉既．

晚飯後，即刻開工做桔仔啦．講出黎大家未必信，我真係未做過桔仔架喎．好彩上年Joey醒咗一盆大桔俾我唧！就靠晒佢做我盲公竹啦．



有朋友在車上教路，做桔仔要用四號九號色架喎．嗄？內膽用咩色呀？你講清楚Ｄ好喎．用淡九號呀？得，又再斷估冇痛苦先．佢又問我用幾號鐵線，我得２８咋．我都知會太粗架啦，但冇吖麻，用住先咯．如果Ｄ桔做得好好睇睇，大家都唔會太介意我條莖粗既．

我都有俾心機整架，下晝都有真係拎個桔仔黎研究過，真實版係冇咁圓既，要扁扁地，用針輕輕吉Ｄ凹凸先，係蘿ＰＡＤ又督個窿，我諗都似啦掛？我求其，因為時間緊迫．我堅持，因為像真度要高．我希望做到人地一睇就覺得不同凡響既迷你麵粉花．兩者間取一個平衡，點都會做出過到自己果關既成品出黎既．



經過兩晚苦幹，就做咗百幾粒出黎，可惜臨尾先悟到最快同最靚既辦法．





d葉呢，分咗三日去整，叫做用盡所有鐵線，整好晒啦．都幾百塊葉架，去到第三日，我亦悟到最摩打手既方法，可以係半個鐘內完成七八十塊葉架！

睇怕最關鍵都係上色啦，諗起都煩．