初一最好都係食素

自細到大，我外家初一第一餐飯，都係食素菜既．雖然結婚後未必遵循，但多數我都會預備素菜．

屋企隨手都有十樣八樣素食材料，我通常會取用八款材料就算．今次，我係天星碼頭有機菜檔買咗芥蘭苗：



俾少少鹽糖，灼咗之後都唔錯架．

少少南瓜片，用黎整色整水．

迷你雞脾菰

少少有機木耳，浸軟備用

罐頭珍珠筍，係呀，我年廿八仲要返工，唔得閒搞咁多野麻．

龍口粉絲，浸軟備用

日本既有機筍

罐頭蘑菰

除粉絲外，全部都要拖拖水，隔水備用．

先用油爆香薑片，放入所有材料（粉絲及芥蘭苗除外），加少許蠔油及半碗清水，兜炒後再放粉絲，滾起後，粉絲都差唔夠腍啦（你可以食條試下，唔夠腍咪煮多陣咯）．

放入芥蘭苗再兜炒，試一試味，唔夠咸先放少少鹽．

收火，加少少麻油就可以上檯架啦！