高纖糙米南瓜粥

食粽子，最好煲個稀稀地既素粥，平衡下。

今次我用咗四分一個南瓜，其實唔算多啦，呢隻南瓜比較細同埋淡色，係冇咁甜既。

一碗粟米粒

一杯糙米，最好洗洗佢浸一陣先用。我係臨時想起用糙米煲既，所以冇浸到。

求其放D蝦干，沖洗下就算啦，我冇乜時間，要趕住返工。

超級大懶人就梗係唔理三七廿一，放晒D蝦乾同粟米入去先開火煲啦。

水滾啦

加埋D米入去，放心啦，唔會煮唔爛既。

跟手再滾起，又放埋D南瓜入去。

滾十分鐘，蓋好，放返入真空煲入面，夠鐘返工啦喂!

黃昏返到屋企，打開個煲睇下，水汪汪，唔怕既。

睇下D糙米，爆開晒啦。呢個先係重點，因為咁先容易消化架。屋企有老人家或小孩，用糙米煲粥，會更高營養。

我要食稀粥去送粽子麻，咁滾佢十分鐘就算咯。

因為隻南瓜唔係咁熟(青青地既)，所以唔會太甜，我放少少鹽調味就算，清清地，咁樣食粽就唔覺滯啦。