洋蔥湯

唔知大家有冇聽聞過洋蔥湯對咳有療效既呢? 但我地講緊既唔係一般既法式洋蔥湯喎。

早前家姐轉寄咗一篇有關飲洋蔥湯黎止咳既電郵，睇落相當簡單，但果D話咳到甩肺又睇咗好多次醫生既朋友問我試過未? 如果未，佢地又唔敢試過，驚d味道難頂呀。

 

實在好簡單架咋，材料只係洋蔥一只，將佢去皮，切片放入大碗，再拎去隔水蒸就得啦。

據聞碗內不用加水，蒸好之後只喝碗入面果少少洋蔥湯(汁)就得啦。

我每年都例牌氣管有事既，呢輪又成日喉嚨痕，搞到好似好想咳咁。我係一個唔識放飛劍既人，就算監硬吐出所謂既痰，都只係白色既。

咁報料果位都話明只適合感冒的咳嗽既，但我已經被呢個氣管問題煩左幾星期咯喎，死馬當活馬醫麻，又唔想去搵大夫，亦唔想食成葯。今次就等我身先士卒，做下白老鼠，睇下係咪真係駛得先!

洋蔥去衣

切件，嘩! 攻鼻挪利! 眼水都出埋。

我將佢放入深碟，一樣唧，我隻洋蔥比較細，放夠兩隻又點話吖。

唔好晒柴火，既然要蒸野咯，就順手係下面蒸埋飯，遲下用黎炒飯都好呀。

咁蒸幾耐，人地又冇寫明，唔理啦，蒸好兜飯要半粒鐘，我俾你蒸夠九個字好未吖?

雖然我好怕食所有香菜類東東，但蒸緊既時候，D洋蔥真係幾香架喎。(就算過咗幾個鐘後，爸爸入屋，都話聞到好香既洋蔥料理咁味，仲估我整咗咩好野食添。)

蒸好，撈起D洋蔥，就得碟底咁多湯汁唧。唔，都幾甜喎，幾好味。一D都唔難頂。

咁剩低既渣又點呢? 佢已經好腍架啦，以我慳儉既性格，食得唔好晒喎。只要加D熱水，放少少忌廉磚或者少少雞湯，少少鹽同埋少少黑胡椒，煮埋個洋蔥忌廉湯食埋佢，又得唧。

我出術，灑咗少少呢D粟米忌廉粉。



將D腍晒既洋蔥放入煲，撈咗少少上面果D粉，灑咗少少黑胡椒，又加D鹽，再放D滾水入去，一滾起就食得啦。呢個就係我既午餐啦:

咪睇佢好似好杰咁，其實只係材料多唧，D洋蔥已經好腍甜架啦。連我呢個唔食洋蔥既人，都可以食晒佢，可知佢真係一D都唔難食架。

至於上面療法有冇功效呢? 我就大概中午飲既，三點去訓咗一陣晏覺。起身呢，喉嚨係舒服少少既，但我唔知我後尾食埋果兜加咗黑椒去整既洋蔥湯有冇影響應有既療效喎。

有一樣大家要注意既，蒸完洋蔥出黎既洋蔥湯，連小朋友都可以接受同適合飲用，但洋蔥係不能多吃架，佢可以治便秘。我一向唔食洋蔥既，一食就一次過食咗兩隻落肚，其實人地淨叫我飲果啖清湯架咋，搞到我肚作怪，轟轟烈烈咁去咗一次洗手間! 好彩只係去一次既唧，唔算肚痾!

果晚訓覺，喉嚨真係順咗好多，冇一路訓、一路咳，睇黎呢條方真係有d用喎。

第二朝起身，即刻入廚房蒸多一個洋蔥，然後先去沖涼。我由得佢蒸夠45分鐘先拎出黎，將隻碟打斜，就係得咁多多汁水咋，要趁熱飲，因為只得幾湯匙架咋，未飲到第三四匙，都變暖啦。今次我唔敢食晒D洋蔥啦，晒就晒啦，掉咗就算咯。到咗黃昏，感覺又再好少少。

一包洋蔥我係超市買都只係$8.9，有成五隻架，咁都只係一個幾毫一劑，飲一、兩次，你應該明顯感覺到佢既療效。就算對你冇效，都唔會飲壞你既。



第三日，要返工啦，唔得閒玩D咁野。日頭想咳想咳既次數減少咗，咁好啦，仲有洋蔥係度，等到放工返去煮飯再整啦。又係順便係蒸飯時蒸埋隻洋蔥。呢晚我打算炆雞翼，咁蒸完洋蔥湯剩咗既洋蔥係咪又掉咗佢呢? 都係煮到D雞翼差唔多熟，就掉埋D腍咗既洋蔥入去煮啦，又可以食埋佢麻，而且D汁仲會好味D添。(嗱! 中醫講呢，咳就唔應該食雞既，我知自己衰架。)


不過呢，想快D好返，就真係要戒下口，橙呀、香蕉呀、生冷雪糕呀、雞呀、辛辣野咁，其實唔應該食既。我呢就樣樣食齊，咁就梗冇咁好啦。仲試過未好得番晒，晚上見食得唔係咁飽，就食咗隻大橙。之後點? 又咳返咯!

根據醫學百科指，洋蔥有發散風寒、抵禦流感、促進消化、對抗哮喘、清除黏痰等等功效，似乎上面條方又幾有道理既。想對洋蔥了解多d，可以去下列網址睇睇:

http://big5.wiki8.com/yangcong_81192/