蜆肉牛油果炆飯

好喜歡韓國花蛤肉，夠大粒，又好味。可以放係冰格，隨時取用，又方便。

係公司加班，返到屋企都晏啦，食咩好呢?

醒起雪櫃有啲冷飯，雖然煮到有少少爛，都整得既。




剛剛去超市買咗牛油果，又有花蛤，咁就拎黎煮埋一堆啦。

花蛤拖拖水，隔水備用，最好就用廚房紙索乾啦，但我D冷飯麻麻地乾身，唯有整炆飯，咁就唔索都得啦。

有海產類，梗係放勁薑穩陣啦，切多D薑米先。

牛油果唔駛太熟既，去皮起核，用黎切粒。用牛油果黎煮野，我乜都敢死架。



呢樽好野呀，係瑤柱咸魚蓉黎，用黎吊下味都唔錯架。

用少少油爆香部份薑米，加一茶匙瑤柱咸魚蓉。

放埋D花蛤入去兜下

兜幾兜都得架啦

畢起備用

再加少少油，放埋其餘既薑米同一茶匙瑤柱咸魚蓉，爆香。 

放埋D飯入去兜，咁上下之後就加埋D牛油果入去兜炒。

再放埋D花蛤肉回鑊。

咪睇D牛油果同花蛤好似好乾身呀，其實佢地係會出少少水既，所以呢D飯係會濕濕地既，所以叫炆飯。成品就好似我地用飯煲整既焗有味飯咁。

兜熱晒D材料，等我加返少少即磨紅海鹽先。

煙 bung bung，香噴噴，正呀! 原來放D牛油果入去整有味飯，都唔錯喎。