青森日本料理

晚上四個人黎新墟呢度開餐，聽講味道唔錯，價錢亦唔算太貴。

花之卷($46)，不過不失啦。

雜錦刺身($158)，款式唔算多，魚生既新鮮程度普通。

鰻魚小卷($22)，呢樣好少會出事既。

雜錦壽司($148)，咁叫會比單點便宜。

野菜天婦羅($58)，老實講，唔算出色，只係因為Bibi想食冬菰天婦羅，而呢度冇單一味咁點先叫既。

炒野菜($42)，份量少，但價錢唔算太貴，可以。

金菰牛肉卷($58)，呢碟出奇大碟，你地見既係面果層，後面都仲有下截既，所以好多舊，尤其我唔食牛既，佢地三個要食晒都幾飽。

串燒雞中翼($28)，太乾，唔好食，埋單$570。

另一日下午，二人同行，又黎食過，叫咗加洲卷($26)，見到佢切到一件厚、一件薄，都幾抵打屁股。

日式燒茄子($38)，好味，但油。

照燒雞中翼 ($35)，都係麻麻。

鰻魚小卷($22)，好似排隊咁: 最矮既企前面。

野菜豚肉葛絲($42)，得幾片豚肉同少少椰菜，加幾條粗粉絲既物體咁。

鐵板豆腐 ($38)，呢碟勁呀，半厘米厚算叫四方形既百福豆腐四件，加少少洋蔥、四條冬菰絲同汁，$3成本煮到出黎既野，賺到笑。

加一杯凍柚子蜜，埋單$216。咁既價錢，我可以去食組長日式放題啦。

呢間野，雖然望落去只係街坊價，但就用好便宜既食材，賣四、五十蚊一碟，唔覺唔覺，座底都要百幾蚊一位落樓。如果只係食個飯或者拉麵既話，就唔駛一百蚊落樓既。